Drejtori i Portit të Durrësit, Liburn Aliu merret në pyetje nga Prokuroria Speciale
Ish-ministri i Mjedisit, Planifikimit Hapësinor dhe Infrastrukturës në Kosovë, Liburn Aliu, është paraqitur në Prokurorinë Speciale të Kosovës, ku është marrë në pyetje në lidhje me një hetim për dyshime për keqpërdorim të detyrës zyrtare.
Aliu, i cili aktualisht mban postin e drejtorit të Portit të Durrësit, është paraqitur në Prokurori i shoqëruar nga avokati i tij.
Sipas raportimeve të mediave në Kosovë, hetimi lidhet me periudhën kur Aliu ishte ministër në Qeverinë Kurti, detyrë të cilën e mbajti deri në gusht të vitit 2025, kur dha dorëheqjen.
Bëhet fjalë për rastin e ambalazhuesve të ujit, ku ish-ministri dyshohet se përmes veprimeve në ushtrimin e detyrës mund t’i ketë shkaktuar dëm financiar shtetit të Kosovës. Deri më tani, ndaj tij nuk është bërë e ditur ndonjë vendim përfundimtar nga organet e drejtësisë.
Liburn Aliu dha dorëheqjen nga posti i ministrit më 27 gusht 2025, pas zhvillimeve politike në Kosovë, ndërsa në tetor të po atij viti u emërua drejtor i Portit të Durrësit.
