Gota kokës në korridor, grushta e shqelma në oborr! Si nisi sherri në Flar Boutique Hotel
Një video e siguruar nga InfoNews Albania tregon momentet e para të përleshjes së ndodhur pak ditë më parë në Flar Boutique Hotel në Malin e Robit, Golem.
Në pamje, Genti Nela kamarier, shihet duke goditur me grusht Arbër Habilajn, i cili rrëzohet në tokë. Më pas, vëllai i Habilajt dhe Enold Dragoti afrohen dhe godasin 18-vjeçarin, derisa ndërhyjnë persona të tjerë për t’i ndarë.
Habilaj pretendon se konflikti nuk nisi për shkak të pagës, por pasi Nelës iu komunikua se duhej të largohej nga puna. Ai thotë gjithashtu se gjatë përplasjes vëllai i tij u dëmtua në kokë dhe mori tetë qepje, ndërsa Nela mori një qepje. Këto pretendime nuk janë verifikuar në mënyrë të pavarur por janë pretendime të pronarëve të Hotelit ku ndodhi dhunimi i kamarierit.
Rrahën kamarierin, lihen në burg djemtë dhe dhëndri i pronarit të Flar Boutique Hotel
Ndërkohë, xhaxhai i Gentit, Melison Nela, është arrestuar pasi u kap i armatosur duke shkuar drejt hotelit. Sipas Policisë, ai dyshohet se po shkonte për hakmarrje. Ndërkohë Genti Nela rezulton se është djali i një punonjësi policie.
Për konfliktin, Florian Habilaj dhe Enold Dragoti janë lënë në arrest në burg për 45 ditë, ndërsa Arbër Habilaj është shpallur në kërkim.
InfoNews Albania thekson se versioni i Habilajt përbën pretendim të një pale të përfshirë në ngjarje. Ndërkohë që pala tjetër pretendon se 18 vjeçari është dhunuar vetëm se pse kërkoi rrogën për ditët që kishte punuar në hotel.
.
