Në fillim të daljes së lajmit, Bankers Petroleum Albania u përpoq të mohonte publikisht gjobën rekord prej 120 milionë euro, duke deklaruar në disa media se kompania “nuk ka marrë asnjë njoftim zyrtar mbi ndonjë penalitet nga Dega e Doganës Fier apo Drejtoria e Përgjithshme e Doganave”.
Në deklaratat e saj, kompania theksonte se ishte “vazhdimisht subjekt i kontrolleve doganore dhe tatimore” dhe se “ka qenë dhe mbetet plotësisht bashkëpunuese me autoritetet”.
Megjithatë, paralelisht me këto mohime publike, SPAK ka hapur zyrtarisht një hetim të gjerë për mënyrën e pezullimit të gjobës rekord që autoritetet doganore i kishin vendosur Bankers Petroleum në vitin 2019.
Kush e fshehu gjobën 120 mln Euro ndaj Bankers?! SPAK shkund edhe Ministrinë e Financave
SPAK hetim për pezullimin e gjobës 120 milionë euro
Hetimi i SPAK u konkretizua me sekuestrimin e dokumentacionit në Ministrinë e Financave dhe Drejtoria e Përgjithshme e Doganave, duke ngritur dyshime serioze për shkelje proceduriale dhe neglizhencë institucionale.
Gjobë rekord për shmangie akcize
Gjobat ndaj Bankers Petroleum u vendosën në vitin 2019, pas një hetimi dyvjeçar të Doganave që pretendonte se kompania kishte shmangur rreth 30 milionë euro akcizë, duke përdorur solarin e prodhuar nga ARMO në rafinerinë e Ballshit.
Me aplikimin e gjobës trefish, shuma totale arriti në 120 milionë euro.
Si u pezullua gjoba?
Pas vendosjes së gjobës, Bankers Petroleum u ankua pranë Ministrisë së Infrastrukturës dhe Energjisë, duke argumentuar se nuk kishte detyrim ligjor për të paguar akcizën e holluesit.
Ministrja e atëhershme e Financave, Anila Denaj, urdhëroi pezullimin e përkohshëm derisa çështja të kalonte për analizë nga Avokatura e Shtetit, për të shmangur rrezikun e një arbitrazhi ndërkombëtar.
Pezullim i paligjshëm për gati 7 vite
Ligji kërkon vendim përfundimtar brenda 6 muajsh për çdo gjobë administrative, por në këtë rast gjoba u mbajt pezull për pothuajse 7 vite.
Vetëm një muaj më parë, Dogana e Fierit e riaktivizoi çështjen – pak ditë para se SPAK të merrte dosjen në dorë.
Roli i drejtuesve të doganave në zvarritjen e gjobës
Raportimet mediatike tregojnë se ish-drejtues të Doganës së Fierit i kanë dërguar disa herë njoftime kreut të Doganave, Genti Gazheli, që nga viti 2021, duke e paralajmëruar për afatet ligjore dhe nevojën për procesimin e gjobës.
Sipas dokumenteve, Gazheli nuk mori asnjë masë, duke e mbajtur çështjen të pezulluar pa arsye ligjore.
Vetëm pasi skandali u publikua dhe Prokuroria e Fierit ia kaloi dosjen SPAK-ut, Doganat tentuan ta rikthenin çështjen për shqyrtim.
