Mbi 5 mijë shqiptarë të rrezikuar nga sulmet SHBA-Izrael-Iran
Ministria e Punëve të Jashtme ka bërë me dije se ndërkohë që Irani po kryen sulme raketore në Emiratet e Bashkuara Arabe, atje ndodhen rreth 1500 shtetas shqiptarë rezidentë dhe po aq turistë, por fatmirësisht nuk ka të lënduar mes tyre.
Në përgjigjen e ministrisë thuhet se Ambasada e Shqipërisë në Emiratet e Bashkuara Arabe ka qenë dhe është në kontakt të vazhdueshëm me bashkëatdhetarët për informacione dhe udhëzime të mëtejshme gjatë dhe pas sulmeve.
Në dispozicion të qytetarëve shqiptarë rezidentë apo turistë në Emirate është për çdo nevojë numri i emergjencës: +971 50 980 7881.
Ministria njofton se hapësira ajrore e Emirateve të Bashkuara Arabe, ashtu si ajo e të gjitha vendeve të Gjirit, është e mbyllur përkohësisht si pjesë e masave për interceptimin e sulmeve dhe do të vazhdojë e tillë deri në një njoftim të dytë nga autoritetet vendase. Hapja e hapësirës ajrore do të ndodhë në momentin kur të mos ketë më sulme dhe kur edhe vendet fqinje të bëjnë të njëjtin hap.
Deri më tani, 3 qytetarë kanë humbur jetën, ndërsa 50 të tjerë janë plagosur në Emiratet e Bashkuara Arabe, kryesisht në Dubai, si pasojë e sulmeve raketore të Iranit, i cili po kundërpërgjigjet ndaj bombardimeve nga Izraeli dhe Shtetet e Bashkuara të Amerikës, që shkaktuan eliminimin e Liderit Suprem Ali Khamenei.
Ministria e Punëve të Jashtme:
Ju informojmë se Ambasada e Republikës së Shqipërisë në Emiratet e Bashkuara Arabe po ndjek me vëmendje situatën në terren pas sulmeve nga Irani dhe është në kontakt të vazhdueshëm me institucionet e linjës së sigurisë në Abu Dhabi.
Ambasada informon se situata e sigurisë në EBA për momentin është e qetë dhe nën kontroll, pasi forcat e armatosura të Emirateve kanë interceptuar dhe neutralizuar shumicën e sulmeve me raketa dhe dronë të nisura nga Irani, kryesisht mbi instalacionet ushtarake dhe bazat amerikane në Abu Dhabi dhe Dubai. Në disa raste, si pasojë e këtyre sulmeve dhe interceptimeve, mbetjet raketore kanë rënë në disa zona banimi. Deri më tani, 3 qytetarë kanë humbur jetën, ndërsa 50 qytetarë janë plagosur. Fatmirësisht, nuk ka shtetas shqiptarë të lënduar.
Në Emirate vlerësohet të ketë rreth 1500 shtetas shqiptarë rezidentë dhe po aq turistë, të cilët hyjnë pa një regjim vizash dhe pa qenë të detyruar të regjistrohen në Ambasadë gjatë udhëtimit të tyre. Ambasada ka qenë dhe është në kontakt të vazhdueshëm me bashkëatdhetarët për informacione dhe udhëzime të mëtejshme gjatë dhe pas sulmeve.
Qytetarëve u është kërkuar të jenë të kujdesshëm, duke shmangur daljet e panevojshme dhe duke ndjekur udhëzimet e sigurisë nga autoritetet lokale.
Hapësira ajrore e Emirateve të Bashkuara Arabe, ashtu si ajo e të gjitha vendeve të Gjirit, është e mbyllur përkohësisht si pjesë e masave për interceptimin e sulmeve dhe do të vazhdojë e tillë deri në një njoftim të dytë nga autoritetet vendase. Hapja e hapësirës ajrore do të ndodhë në momentin kur të mos ketë më sulme dhe kur edhe vendet fqinje të bëjnë të njëjtin hap. Kjo pasi vende si Arabia Saudite, Katari, Kuvajti, Jordania apo edhe Bahreini e kanë të mbyllur hapësirën ajrore dhe është i pamundur për momentin kalimi tranzit mbi këto territore. Fillimi i fluturimeve do të jetë i mundur vetëm pas normalizimit të situatës.
Ambasada e Republikës së Shqipërisë në Abu Dhabi është në dispozicion të qytetarëve shqiptarë rezidentë apo turistë në Emiratet e Bashkuara Arabe dhe u kërkon të shmangin sa më shumë daljet e panevojshme, grumbullimet në qendra tregtare, dhe të kontaktojnë për çdo nevojë në numrin e emergjencës: +971 50 980 7881.
