Rritet buxheti për Policinë e Shtetit, 140 milionë lekë për indeksimin e pagave të punonjësve
Ministri i Punëve të Brendshme, Besfort Lamallari, njoftoi se përmes Aktit Normativ të Buxhetit 2026, financimi për Policinë e Shtetit do të rritet me 701 milionë lekë, me synim forcimin e mbështetjes për efektivët dhe vijimin e investimeve për modernizimin e institucionit.
Sipas Ministrisë së Brendshme, nga fondi shtesë prej 701 milionë lekësh, 140 milionë lekë janë parashikuar për indeksimin e pagave të punonjësve të Policisë së Shtetit.
Pjesa tjetër e financimit do të përdoret për mbështetjen e veprimtarisë së Policisë së Shtetit, përmirësimin e kushteve të punës dhe investime që lidhen me modernizimin e strukturave dhe rritjen e kapaciteteve të institucionit.
Ministria e Brendshme e konsideron këtë shtesë buxhetore si pjesë të angazhimit për të rritur mbështetjen ndaj punonjësve të policisë dhe për të garantuar një shërbim më efikas për qytetarët.
