Sherr në resortin ‘Diamma’ në Golem! Menaxheri dhe punonjësit dhunojnë 5 turq
DURRËS-Një konflikt i dhunshëm mes punonjësve të ‘Diamma Resort’ dhe pesë pushuesve turq është regjistruar në zonën e Golemit. Policia bën me dije se janë arrestuar në flagrancë menaxheri i subjektit, 33 vjeç, dhe një punonjës 37-vjeçar, pasi dyshohet se gjatë konfliktit, për motive të dobëta, kanë goditur me sende të forta dy turistë turq.
Sipas burimeve, turistët kanë qenë duke konsumuar ushqim dhe pije në ambientet e lokalit, kur mes tyre dhe personelit ka nisur një debat, pasi punonjësit u kanë kërkuar të mos bëjnë zhurmë. Ka qenë menaxheri i resortit David Kondo dhe një punonjës i plazhit Eluert Qose që me sende të forta kanë dhunuar fillimisht dy prej turistëve turq.
Ndërkohë, janë proceduar penalisht në gjendje të lirë edhe banakieri dhe punonjësi i sigurisë së lokalit, të dyshuar se kanë goditur dhe kanosur tre turistë të tjerë.
Njoftimi i policisë:
U konfliktuan fizikisht dhe me sende të forta, me 5 pushues turq, arrestohen 2 shtetas dhe procedohen penalisht 2 të tjerë (punonjës në subjektin ku ndodhi konflikti).
Menjëherë pas njoftimit për një konflikt ndërmjet disa shtetasve, në një lokal në plazh, në Golem, shërbimet e Stacionit të Policisë Plazh organizuan punën dhe shkuan në vendngjarje, me qëllim identifikimin dhe nxjerrjen përpara përgjegjësisë penale, të shtetasve përgjegjës. Në vijim të veprimeve procedurale për rastin:
-u arrestuan në flagrancë shtetasit D. K., 33 vjeç dhe E. Q., 37 vjeç, të dy banues në Durrës, përkatësisht menaxher dhe punonjës në hapësirën e plazhit në këtë subjekt, për veprat penale “Plagosja e rendë me dashje”, kryer në bashkëpunim, dhe “Prishja e qetesisë publike”, pasi dyshohet se gjatë konfliktit për motive të dobëta, kanë goditur me sende të forta, 2 pushues turq;
-u referuan materialet në Prokurori, ku nisi procedimi në gjendje të lirë, për veprat penale “Plagosja e lehtë me dashje”, kryer në bashkëpunim, dhe “Kanosja”, për shtetasit I. Sh., 48 vjeç dhe T. D., 49 vjeç, përkatësisht banakier dhe punonjës sigurie në këtë subjekt, pas dyshohet se kanë goditur dhe kanosur 3 shtetas turq.
Materialet procedurale iu referuan Prokurorisë së Durrësit, për veprime të mëtejshme.
