Në kërkim nga SPAK, raportimet e fundit e vendosin Ergys Agasin në një jaht në Dërmi
Biznesmeni Ergys Agasi, i shpallur në kërkim nga Prokuroria e Posaçme (SPAK) në kuadër të hetimeve për dosjen e AKSHI-t, rezulton sërish në qendër të vëmendjes. Sipas raportimeve të publikuara sot nga media Politikon, Agasi është parë së fundmi duke lundruar me një jaht në zonën e Dhërmiut, në shoqërinë e disa personave të tjerë. Deri më tani nuk ka një konfirmim zyrtar nga autoritetet lidhur me këto raportime.
Nëse informacioni i publikuar rezulton i saktë, ai ngre pikëpyetje mbi mundësinë që një person i shpallur në kërkim të lëvizë lirshëm, ndërsa autoritetet vijojnë përpjekjet për lokalizimin e tij.
Një situatë e ngjashme u evidentua edhe në rastin e Ermal Beqirit, i cili, ndonëse ishte shpallur në kërkim nga SPAK, u lokalizua dhe u arrestua më pas në Francë, çka nxiti debat mbi efektivitetin e ekzekutimit të masave ndaj personave të kërkuar ndërkombëtarisht.
