Me kërkesë të Prokurorisë së Posaçme (SPAK), Gjykata e Posaçme Kundër Korrupsionit dhe Krimit të Organizuar (GJKKO) ka vendosur zgjatjen me tre muaj të afateve hetimore për çështjen e njohur si dosja “Bankers”. Sipas organit të akuzës, shtyrja është e nevojshme për kryerjen e veprimeve të tjera hetimore shtesë, për shkak të kompleksitetit të lartë të çështjes.
Kërkesa u paraqit në gjykatë nga prokuroret Enkeleda Millonai dhe Anita Jella dhe u miratua nga gjyqtari Erion Çela.
Aktualisht, i vetmi person që ndodhet në masën e sigurisë “arrest në burg” është CEO kinez i kompanisë Bankers Petroleum, Hongping Xiao. Të pandehurit e tjerë janë nën masa më të buta sigurie, përfshirë arrestin në shtëpi.
Hetimet lidhen me dyshime për deklarime të rreme tatimore dhe shmangie të detyrimeve financiare për periudhën 2004–2024, të cilat sipas Prokurorisë kanë shkaktuar një dëm të konsiderueshëm në buxhetin e shtetit. SPAK deklaron se Bankers ka realizuar shitje dhe eksporte nafte në vlerën totale prej rreth 532 miliardë lekësh, ndërkohë që ka deklaruar humbje për çdo vit, me një total prej 11.7 miliardë lekësh. Sipas akuzës, kjo skemë ka shërbyer për shmangien e tatimit mbi fitimin dhe përfitimin e rimbursimeve të dyshimta të TVSH-së.
Arrestimi i CEO-s aktual, Hongping Xiao, si dhe i ish-drejtuesit të kompanisë, Leonidha Çobo, shpallja në kërkim e pesë personave të tjerë dhe vendosja e masave të sigurisë për shtatë persona të përfshirë në këtë çështje u realizuan gjatë javës së parë të korrikut.
Prokuroria i akuzon personat e arrestuar dhe ata në kërkim për një sërë veprash penale, përfshirë: “Krijimi i skemave mashtruese lidhur me tatimin mbi vlerën e shtuar”, “Fshehja e të ardhurave”, “Pastrimi i produkteve të veprës penale ose veprimtarisë kriminale”, “Shpërdorimi i detyrës” dhe “Moskryerja e detyrave nga organet tatimore”, të parashikuara nga nenet 144/a, 180/3, 287, 248 dhe 181/a të Kodit Penal. Çështja ka nisur fillimisht nga akuzat për evazion fiskal dhe mashtrim me taksat të ngritura nga Prokuroria e Fierit.
