SPAK zbarkon në Vlorë! Hetim për tjetërsimin e pronave në Orikum, Dukat dhe Rradhimë
Dosja për dyshimet e përvetësimit të pronave në Orikum, Dukat dhe Rradhimë kalon në SPAK
Hetimi për dyshimet e falsifikimit të dokumenteve dhe përvetësimit të pronave në zonat e Orikumit, Dukatit dhe Rradhimës është transferuar nga Prokuroria e Vlorës në Prokurorinë e Posaçme (SPAK), pas shpalljes së moskompetencës nga organi vendor i akuzës.
Procedimi penal është regjistruar nga SPAK mbi bazën e kallëzimeve të depozituara nga banorë të këtyre zonave, të cilët pretendojnë se prona të konsiderueshme bujqësore janë përvetësuar përmes dokumenteve të falsifikuara dhe më pas janë regjistruar në hipotekë.
Burime pranë hetimit bëjnë me dije se SPAK ka kërkuar edhe të gjithë dokumentacionin dhe veprimet hetimore të kryera deri tani nga Prokuroria e Vlorës, me qëllim vijimin e hetimeve.
Në kuadër të procedimit, SPAK, në bashkëpunim me Prokurorinë e Vlorës, ka ushtruar kontrolle në disa ambiente dhe banesa në qytetin e Vlorës, përfshirë edhe zyrat e Hipotekës, ku janë sekuestruar materiale me interes për hetimin.
Sipas dyshimeve, sipërfaqe të mëdha toke në Orikum, Dukat dhe Rradhimë janë regjistruar në mënyrë të paligjshme përmes dokumenteve të falsifikuara, duke cenuar të drejtat e pronarëve që pretendojnë se i kanë përfituar këto prona në bazë të ligjit nr. 7501.
Kallëzimet janë paraqitur nga banorë të zonave të prekura, të cilët kërkojnë hetim për veprat penale “Shpërdorim detyre”, “Falsifikim dokumentesh”, si edhe për dyshime mbi veprimtari të organizuar kriminale.
