S’ka tolerancë ndaj alkoolit në timon, Policia kërkon 279 mijë gojëza për alkooltestuesit
Policia Rrugore po përgatitet për kontrolle më të shpeshta ndaj drejtuesve që qarkullojnë nën efektin e alkoolit.
Operatori i Blerjeve të Përqendruara ka hapur procedurën e tenderit për blerjen e aksesorëve për aparatet alkooltestues të Policisë Rrugore, për vitet 2026, 2027 dhe 2028.
Fondi limit i procedurës është 26.9 milionë lekë pa TVSH, ose rreth 280 mijë euro, sipas kursit të këmbimit të përdorur në dokumentet e tenderit.
Blerja do të bëhet për llogari të Drejtorisë së Përgjithshme të Policisë së Shtetit, ndërsa procedura është parashikuar si marrëveshje kuadër me afat 36 muaj.
Në total, Policia kërkon 279,039 gojëza plastike njëpërdorimshe për aparatet alkooltestues Drager 7510.
Sipas grafikut të lëvrimit, për vitin 2026 parashikohen 69,039 copë, për vitin 2027 100,000 copë, ndërsa për vitin 2028 110,000 copë.
Këto aksesorë përdoren në testet që kryhen nga Policia Rrugore për të verifikuar nivelin e alkoolit te drejtuesit e automjeteve.
Dokumentet e tenderit përcaktojnë se gojëzat duhet të jenë njëpërdorimshe, të ambalazhuara hermetikisht, higjienike dhe të prodhuara me plastikë 100% të riciklueshme.
Produkti duhet të jetë brenda standardeve të CE-së dhe të mos klasifikohet si i rrezikshëm.
Afati i lëvrimit të mallit, pas nënshkrimit të kontratës, do të jetë 60 ditë, ndërsa furnizimi do të bëhet sipas kërkesave të Policisë përgjatë periudhës 36-mujore.
Kjo procedurë tregon se kontrollet për alkoolin në timon pritet të mbeten një nga prioritetet e Policisë Rrugore në vitet e ardhshme.
Me afro 280 mijë gojëza të reja për alkooltestuesit, mesazhi është i qartë: toleranca ndaj alkoolit në drejtimin e mjetit do të jetë gjithnjë e më e ulët.
