Qindra persona në Shqipëri po raportojnë se u është bllokuar aksesi në disa faqe interneti përmes rrjetit të kompanisë One Albania. Shumë përdorues shohin paralajmërime si “rrjeti nuk është i sigurt” ose pamundësi për të hapur faqe që funksionojnë normalisht në rrjete të tjera.
ONE ka renditur faqen e Kryeministrisë dhe mediat.al si të pasigurta, duke i cilësuar “armikë” të internetit shqiptar.
Këto shqetësime vijnë pak kohë pasi Autoriteti Kombëtar i Sigurisë Kibernetike (AKSK) ka konfirmuar zyrtarisht se në rrjetet e One Albania dhe Vodafone janë instaluar pajisje të teknologjisë Deep Packet Inspection (DPI). Kjo u bë për të zbatuar vendimin e qeverisë për bllokimin e platformës TikTok, ndërsa pajisjet janë marrë huazim nga autoritetet kibernetike të Izraelit. DPI një teknologji e njohur globalisht për aftësinë e saj për të monitoruar, filtruar dhe kontrolluar trafikun e internetit.
Sipas AKSK, DPI “nuk lexon mesazhet” pasi komunikimet janë të enkriptuara, por vetëm “kokën e paketave të trafikut” (IP header).
Megjithatë, ekspertë dhe organizata për të drejtat digjitale paralajmërojnë se përdorimi i kësaj teknologjie pa transparencë të plotë dhe kornizë ligjore mund të hapë rrugë për kontroll të tepruar të internetit, shkelje të privatësisë dhe kufizim të lirisë së shprehjes.
Ndërkohë, përdoruesit po ndiejnë pasojat direkt, duke mos pasur akses në disa faqe dhe duke hasur probleme sigurie gjatë shfletimit. Kjo ka ngritur pyetje të forta mbi sa i gjerë është bllokimi dhe nëse DPI po përdoret edhe për qëllime të tjera përveç TikTok-ut.
Ekspertet dhe Organizatat për të drejtat digjitale paralajmërojnë se mungesa e transparencës dhe e një baze ligjore të qartë e kthen këtë praktikë në një instrument të rrezikshëm për censurë dhe mbikëqyrje masive.
Ndërkohë, qytetarët po vuajnë pasojat direkte: mungesë aksesi në faqe të caktuara, ndërprerje të shfletimit dhe paralajmërime të rrezikshme sigurie që komprometojnë besimin tek ofruesi i shërbimit.
Pyetja që sot ngrihet me forcë është: A është bllokimi i TikTok vetëm maja e ajsbergut? A po përdoret DPI për të kufizuar më gjerë internetin në Shqipëri?
