Alketa Rizai në beach bar-in ku ndodhi përleshja e përgjakshme – Dy të plagosur

Sipas informacioneve të iEidiseis, fillimisht Rizai ndodhej në lokal së bashku me shoqërinë e tij.

Policia ka nisur të zbardhë ngjarjen e përgjakshme me të shtëna armësh në Anavyssos, jashtë një beach bar-i të njohur të zonës, në orët e para të mëngjesit të së dielës. Kamerat e sigurisë kanë ndihmuar në zbardhjen e ngjarjes dhe kanë treguar se një person i përfshirë në të shtënat, si pasojë e të cilave u plagosën dy punonjës të lokalit, dyshohet se ishte i njohuri Alket Rizai, një kriminel shqiptar.

Alket Rizai ndodhej jashtë burgut, pasi kishte marrë leje nga burgu i Domokosit. Policia mori një telefonatë rreth orës 05:15, për të shtëna me armë në beach bar-in që ndodhet në Bulevardin Athinë–Sunion.

Policët që mbërritën në vendngjarje nuk gjetën personat e përfshirë, por konstatuan dy gëzhoja dhe gjurmë gjaku.

Pak më vonë, në Qendrën Shëndetësore të Kalivionit u gjetën dy të plagosur. Bëhet fjalë për një 20-vjeçar grek, i cili kishte marrë një dëmtim nga copëzat e xhamit, dhe një 41-vjeçar pakistanez, i cili kishte një plagë tejshpuese nga plumbi në pulpë.

Sipas informacioneve, dy të plagosurit kanë dhënë versione të ndryshme për atë që kishte ndodhur. Nga hetimet e Policisë dhe analiza e pamjeve të kamerave të sigurisë, të cilat po shqyrtohen në detaje, ka nisur të formohet kronologjia e përleshjes.

Sipas informacioneve të iEidiseis, fillimisht Rizai ndodhej në lokal së bashku me shoqërinë e tij. Kur beach bar-i ndaloi muzikën për shkak të orarit të vonë, ai u largua bashkë me personat që e shoqëronin.

Pak më vonë, megjithatë, dyshohet se ai dhe shoqëria e tij vendosën muzikë në makinën e tyre me volum shumë të lartë. Pronari i lokalit doli për t’u kërkuar që ta ulnin zërin dhe pas kësaj nisi një përplasje e ashpër.

Zhurma dhe sherri bënë që punonjësit dhe klientët të dilnin jashtë lokalit. Sipas të dhënave që po shqyrtojnë autoritetet, në këtë moment Alket Rizai dyshohet se nxori një armë. Po hetohet nëse ai qëlloi në ajër, pasi ky detaj ende nuk është sqaruar.

Më pas, një burrë që ndodhej në anën tjetër dyshohet se nxori gjithashtu armë dhe qëlloi në drejtim të Rizait.

Nga të shtënat u plagosën dy punonjës të lokalit.

Autoritetet po shqyrtojnë tashmë pamjet e kamerave, dëshmitë dhe provat e gjetura në vendngjarje, në mënyrë që të përcaktojnë me saktësi se kush qëlloi, sa të shtëna u kryen dhe cili ishte roli i secilit prej personave të përfshirë në përleshje.