Raiffeisen Bank ka reaguar pas ankesave të disa klientëve, të cilët gjatë ditës së sotme kanë raportuar në media dhe në rrjetet sociale ndryshime të papritura në balancat e llogarive të tyre.
Klientët kanë pretenduar se kanë konstatuar lëvizje në llogaritë bankare, edhe pse, sipas tyre, nuk kanë kryer transaksione me kartë që do t’i justifikonin këto ndryshime, shkruan infonews.al.
SKANDAL te Raiffeisen Bank! Klientëve u zhduken paratë, banka nuk përgjigjet…
Në një reagim zyrtar, banka ka pranuar se disa klientë janë përballur përkohësisht me ndryshime në balancat e llogarive, duke i lidhur ato me disa transaksione me kartë.
SKANDALI Raiffeisen Bank
“Gjatë ditës së sotme, disa nga klientët tanë kanë hasur përkohësisht ndryshime në balancat e llogarive të tyre, të lidhura me disa transaksione me kartë. Situata është adresuar plotësisht dhe balancat e llogarive pasqyrojnë gjendjen e saktë”, thuhet në njoftimin e bankës.
Burimi i brendshëm: “Janë gjetur llogaritë e prekura dhe paratë janë rikthyer pra zëvendësuar për të shmangur skandalin. Dyshohet për vjedhje masive”
Ndërkohë, InfoNews ka mësuar detaje të tjera nga një burim brenda Raiffeisen Bank, i cili ka folur në kushte anonimiteti për shkak të natyrës së informacionit.
Sipas burimit, pas evidentimit të problematikës, banka ka kryer verifikimet e brendshme dhe ka identifikuar llogaritë e klientëve që dyshohet se janë prekur nga lëvizjet e pazakonta.
Burimi pretendon se janë evidentuar llogaritë e prekura dhe shumat e munguara janë rikthyer në llogaritë e klientëve, me qëllim korrigjimin e situatës dhe rikthimin e balancave në gjendjen reale.
Sipas të njëjtit burim, ndërhyrja është kryer pasi banka ka konstatuar problematikën dhe ka ndërmarrë veprime për të rikthyer shumat përkatëse te klientët.
Ky informacion ngre pikëpyetje mbi mënyrën se si janë krijuar lëvizjet në llogaritë bankare dhe mbi numrin e klientëve të prekur. Nëse bëhet fjalë për transaksione të regjistruara gabimisht, një problem teknik apo një tjetër mekanizëm, kjo mbetet për t’u sqaruar zyrtarisht nga banka.
Deri më tani, Raiffeisen Bank nuk ka bërë publike numrin e klientëve të prekur, shumën totale të transaksioneve apo mekanizmin konkret që shkaktoi ndryshimet në balanca.
Banka ka deklaruar vetëm se situata është adresuar plotësisht dhe se balancat e llogarive tashmë pasqyrojnë gjendjen e saktë.
InfoNews vijon verifikimet lidhur me rastin.
