EMRI/ Zbardhet plagosja e dyfishtë në Laprakë, kush është autori
Arbër Krashi është personi i shpallur në kërkim nga Policia e Tiranës pas të shtënave me armë zjarri në zonën e Laprakës, ku mbetën të plagosur dy persona. Krashi dyshohet se është përfshirë në konfliktin që mbrëmjen e djeshme përfundoi me përdorimin e një pistolete në fushën e sportit.
Sipas të dhënave paraprake të hetimit, Krashi kishte njohje me dy të plagosurit, Bledar Dautin, 39 vjeç, dhe Dashamir Tahirin, 35 vjeç. Të tre dyshohet se kishin pasur një konflikt të mëparshëm, i cili kishte nisur rreth dy vite më parë dhe që mbrëmjen e djeshme është riaktivizuar.
Debati mes palëve ka përshkallëzuar deri në përdorimin e armës së zjarrit. Si pasojë, Dauti dhe Tahiri kanë marrë plagë në këmbë, bark dhe në zonën e legenit.
Pas ngjarjes, autori i dyshuar është larguar nga vendi i ngjarjes. Gjatë kontrolleve në terren, efektivët e Policisë kanë gjetur të braktisur, vetëm pak metra larg fushës së sportit, mjetin që dyshohet se është përdorur nga Krashi.
Dy të plagosurit janë dërguar në Spitalin e Traumës, ku ndodhen jashtë rrezikut për jetën. Ata pritet të merren në pyetje nga grupi hetimor sapo gjendja e tyre shëndetësore ta lejojë, për të hedhur më shumë dritë mbi mënyrën se si nisi dhe përshkallëzoi konflikti.
Policia vijon kërkimet për kapjen e Arbër Krashit, ndërsa hetuesit po punojnë për dokumentimin e plotë të ngjarjes dhe përcaktimin e motivit të saktë që çoi në përdorimin e armës.
