I kërkuari nga SPAK Festim Qoli, betejë në Gjykatë të Lartë me kompaninë SIGAL: Dua dëmshpërblimin e tërmetit të 2019-ës
Festim Qoli i është drejtuar Gjykata e Lartë me rekurs ndaj kompanisë së sigurimeve SIGAL UNIQA Group Austria, duke kërkuar njohjen e dëmshpërblimit për një objekt të dëmtuar nga tërmeti i 26 nëntorit 2019 në Durrës.
Sipas padisë së depozituar në Gjykatën e Lartë, paditës janë Festim Qoli, dhe Alush Qoli , të cilët pretendojnë se një objekt banimi dhe shërbimi 3 kate plus papafingo, i ndodhur në zonën e Shkozetit, është dëmtuar tërësisht nga tërmeti tragjik i vitit 2019.
Në rekursin e paraqitur, palët paditëse kërkojnë detyrimin e kompanisë së sigurimeve për të njohur rastin e sigurimit dhe për të kryer pagesën e plotë të vlerës së objektit, duke argumentuar se prona ka qenë e siguruar pranë SIGAL UNIQA Group në pronesi te Avni Ponari, bazë të policës së sigurimit të datës 29 tetor 2015.
Në objektin e padisë thuhet:
“Detyrimi i palës së paditur Kompania e Sigurimeve Sigal Uniqa Group sh.a për të njohur rastin e shpërblimit të dëmit dhe përmbushjen e detyrimit sipas policës së sigurimit të pronës duke bërë pagimin e plotë të vlerës së sendit të tipit objekt banimi dhe shërbimi 3 kat + papafingo, në Shkozet Durrës, e dëmtuar tërësisht nga tërmeti i datës 26.11.2019”.
Padia mbështetet në nenet 32 dhe 154 e vijues të Kodit të Procedurës Civile, si dhe në nenet 1050 dhe 1113 e vijues të Kodit Civil, përveç kontratave të kredisë të viteve 2014 dhe 2015 dhe policës së sigurimit.
Çështja aktualisht ndodhet në fazën e shqyrtimit në Gjykatën e Lartë dhe pritet caktimi i datës së seancës, ku do të vendoset nëse rekursi i paraqitur nga Festim Qoli dhe palët e tjera do të pranohet apo jo për shqyrtim të mëtejshëm.
Emri i Festim Qolit është bërë publik edhe në raportime të mëparshme lidhur me hetime të SPAK, ndërsa rezulton person në kërkim.
