Kush po gënjen? Bedinaj: Më kërkoi 5 mln euro! Luan Muça: Nuk kam vendosur gjobë

VLORË- Detaje të reja dalin në dritë nga përplasja mes dy biznesmenëve, Vasil Bedinaj, pronar i disa hoteleve në Vlorë, dhe Luan Muçës, pronar i “Delta Group” dhe “Deutsch Color”, ngjarje e ndodhur dje në hotelin e Bedinajt, “Regina Palm Resort”, në Radhimë.

Përplasja mes dy biznesmenëve çoi në pranga 5 persona, mes tyre biznesmenin e njohur Luan Muça, 3 persona nga grupi i tij dhe një person nga grupi i Bedinajt. Policia e Vlorës ka shpallur gjithashtu në kërkim vëllanë e Muçës, ish-deputetin Bujar Muça, ndërsa roli i tij në ngjarje ende nuk dihet.

E gjithë përplasja mes dy biznesmenëve të njohur, Muça dhe Bedinaj, ka nisur rreth orës 11:30 të 3 shtatorit. Pasi Luan Muça ka mbërritur së bashku me grupin e armatosur në “Regina Palm”, në Radhimë të Vlorës, ai është futur brenda ambienteve të resortit, ku ka gjetur Bedinajn të ulur në një tavolinë.

Palët kanë dhënë deklarime të ndryshme në polici, ndërsa hetimet vijojnë edhe për konflikte të tjera të mundshme mes dy biznesmenëve. Mes pistave që po hetohen nuk përjashtohen edhe konfliktet për prona në zonat bregdetare në jug të vendit.

Në dëshminë e dhënë para grupit hetimor, biznesmeni Vasil Bedinaj ka pretenduar se pronari i “Delta Group” i ka vendosur një gjobë prej 5 milionë eurosh dhe i ka kërkuar “të zhduket” nga Shqipëria brenda 48 orëve.

Bedinaj mësohet se ka deklaruar gjithashtu se grupi i armatosur i Luan Muçës nuk ka lejuar punonjësit e tjerë të stafit t’i afrohen, duke i kërcënuar, ndërsa vetë ai pretendon se është qëlluar në kokë.

“Mendova se do të takoheshim për çështje biznesi, pasi ai merret me hidrosanitare. Ndërkohë që kam qenë vetëm në ‘Regina Palm’, Luani ka ardhur dhe ka thënë: ‘Dua 5 milionë euro dhe ke afat 48 orë të zhdukesh nga Shqipëria’. Më pas, m’u afruan shumë persona dhe nuk më linin të çohesha. Punonjës të tjerë të stafit janë mbajtur nën kërcënimin e armës që të mos afroheshin. Disa prej truprojave të tij më qëlluan në kokë”, ka dëshmuar ai.

Por ndryshe nga Bedinaj, i cili pretendon për gjobëvënie, biznesmeni tjetër i ka mohuar këto akuza. Në deklaratën e parë që ka dhënë në spital, Luan Muça mësohet se ka pretenduar: “Nuk kam vendosur gjobë”.

Biznesmeni, së bashku me dy të arrestuarit e tjerë, Klaudio dhe Mandrit Lleshaj, pronarë të kompanisë së sigurisë “Swat Security”, kanë dëshmuar se konflikti me Bedinajn lidhet me një çështje pronësie. Bedinaj e mohon këtë pretendim.

Të njëjtin qëndrim mbajti dje edhe mbrojtja e Luan Muçës për mediat. Sipas saj, takimi mes palëve ishte zhvilluar për t’u sqaruar “lidhur me një investim në bregdetin e Jugut ku palët kanë pretendime për ligjshmërinë e dokumentacionit”.

Grupi hetimor po verifikon disa pista, përfshirë pretendimin e Bedinajt për gjobëvënie, si edhe ndonjë konflikt të mundshëm pronësie, që është artikuluar edhe në disa media.

Ka qenë vetë Bedinaj ai që ka njoftuar policinë për ngjarjen. Më pas, grupi i armatosur, punonjës sigurie të “Swat Security”, së bashku me Luan Muçën, janë larguar nga vendi i ngjarjes.

Në dalje nga resorti, njeriu i Bedinajt ka qëlluar me armën me leje që mbante Bedinaj në drejtim të makinave, duke lënë gjurmë plumbash në të paktën një prej tyre. Bëhet fjalë për një “Range Rover”, i cili u kap në Fier, ndërsa drejtohej nga Blerim Heta, shtetas i Kosovës, i cili u vu në pranga.

Në këtë makinë janë gjetur edhe njolla gjaku, ndërsa policia dyshon se mund të ketë pasur një person të plagosur me armë.

Luan Muça fillimisht është larguar nga resorti me një “Audi A8”, i cili më pas u gjet i djegur në Radhimë. Pas kësaj, ai ka ndërruar automjet dhe, së bashku me dy pronarët e “Swat Security”, është larguar me një “Range Rover” të zi luksoz.

Policia e ka pikasi mjetin në zonën e quajtur Rrethi i Alikokës, por biznesmeni 55-vjeçar Luan Muça, së bashku me dy personat e tjerë, kanë refuzuar urdhrin e policisë për të ndaluar dhe janë larguar.

Në tentativë për t’u arratisur, automjeti “Range Rover” është përplasur. Si pasojë, Luan Muça dhe Mandrit Lleshaj kanë përfunduar në spital.

Hetimet vijojnë për të zbardhur të plotë dinamikën e ngjarjes, përfshirjen e personave të tjerë dhe motivin e konfliktit mes dy biznesmenëve.