Testi për Prokurorinë e Elbasanit! Hetimi për shembjen e rrugës, dy kompanitë dhe provat në terren!
Prokuroria e Elbasanit ka nisur me iniciativë hetimet lidhur me dëmtimet e shkaktuara që nga dita e djeshme, të cilat çuan në bllokimin e plotë të qarkullimit në aksin rrugor Librazhd–Pogradec.
Procedimi penal është regjistruar për veprat penale “Shpërdorim i detyrës”, “Shkelje e barazisë në tendera apo ankande publike”, “Shkatërrimi i rrugës” dhe “Ndotja e ajrit, ujit apo tokës”. Për hetimin e rastit është ngritur një grup i posaçëm hetimor, i cili pritet të verifikojë rrethanat, përgjegjësitë institucionale dhe zbatimin e kontratave përkatëse.
Si pasojë e dëmtimeve të rënda në segmentin Librazhd–Pogradec, Autoriteti Rrugor Shqiptar vendosi bllokimin e plotë të qarkullimit në këtë aks, duke ndaluar lëvizjen si për automjetet, ashtu edhe për këmbësorët, për shkak të rrezikut që paraqet zona.
Prej më shumë se 24 orësh, lidhja e vetme nga Tiranë drejt Korçë realizohet përmes aksit Maliq–Moglicë–Gramsh, një rrugë me infrastrukturë të amortizuar, e cila përshkohet me vështirësi dhe e zgjat udhëtimin me rreth një orë.
Ndërkohë, hetimet pritet të zbardhin nëse dëmtimet janë pasojë e faktorëve natyrorë apo e ndërhyrjeve të kryera në zonë, si dhe nëse ka përgjegjësi penale nga subjektet e përfshira në punimet e realizuara në këtë segment strategjik rrugor.
Drejtori i Autoritetit Rrugor Shqiptar, Ami Kozeli, ka deklaruar se nga verifikimi i dokumentacionit rezulton se rrëshqitja masive e tokës dhe dëmtimi i rrugës Librazhd–Pogradec nuk kanë lidhje me shfrytëzimin e lumit Shkumbin për marrjen e inerteve nga kompania kontraktore. Sipas tij, koordinatat e lejes dhe dokumentacioni janë në përputhje me rregullat.
“Gjatë këtyre 2 ditëve kam parë në rrjetet sociale që lidhin fenomenin e ndodhur me punimet ose marrjen e inerteve në lumë. Do doja shumë ta përgënjeshtroja sepse është dezinformim. Unë sot kam qenë në komunikim me IKMT, e cila ka sjellë dhe drejtorinë vendore të Elbasanit për të bërë një kontroll të dokumentacionit të kompanisë kontraktore. M’u konfirmua që koordinatat e dhëna në leje janë të sakta, pra aty ku merren inertet janë të sakta për këtë segment që ne po flasim. Ashtu sikur edhe leja e shfrytëzimit ka të gjithë dokumentacionin e nevojshëm”, – tha Kozeli.
Por gazetari Osman Stafa, ditën e sotme ka qenë i pranishëm në shtratin e lumit, ku shikohet qartë se aty ka pasur ndërhyrje dhe është gërryer shtrati. Buzë lumit, si pasojë e gërryerjes nga kompanitë për të marrë inerte, janë dëmtuar edhe segmentet e hekurudhës së ndërtuar që në kohën e diktaturës. Dëmtimet shihen qartë me sy të lirë dhe, sipas tij, janë kryer së fundmi për shkak të marrjes së inerteve.
Ndërkohë, qytetarët dhe bizneset po përballen me pasoja të rënda ekonomike, pasi ky aks është nyje kyçe që lidh vendin me doganat e Qafë Thanë dhe Kapshticë, ndërsa aktualisht asnjë kamion nuk mund të lëvizë.
Situata mbetet kritike, ndërsa qytetarët kërkojnë përgjegjësi dhe transparencë për dëmet e shkaktuara në një nga akset më të rëndësishme kombëtare.
