Ndërpreu shërbimin, One Albania pranon skandalin: Ishte momentale
Pas raportimeve për një ndërprerje të gjerë të rrjetit celular që la mijëra abonentë pa shërbim, ka ardhur edhe reagimi i kompanisë One Albania.
Në një përgjigje ndaj qytetarëve, kompania ka kërkuar ndjesë për shqetësimin e shkaktuar, duke theksuar se problematika ka qenë momentale.
“Përshëndetje, ndjesë për shqetësimin e krijuar, problematika ka qenë momentale. Nëse hasni sërish në vështirësi, ju lutem fikni dhe ndizni aparatin dhe testoni sërish shërbimin”, thuhet në reagimin e One Albania.
Megjithatë, reagimi nuk duket se ka qetësuar plotësisht abonentët. Qindra qytetarë kanë vijuar të komentojnë në postimet e kompanisë duke kërkuar më shumë sqarime për ndërprerjen e rrjetit që sipas tyre preku shumë zona të vendit. Në disa komente në rrjetet sociale, përdorues të ndryshëm kanë shprehur pakënaqësi të fortë ndaj operatorit, madje duke e cilësuar One Albania edhe si “kompani hajdute”.
Ndërkohë, deri tani kompania nuk ka dhënë një shpjegim të detajuar mbi shkaqet teknike të incidentit apo mbi kohëzgjatjen e plotë të ndërprerjes së shërbimit.
