TIRANË – Gjykata e Posaçme ka dhënë vendimet për shtatë personazhe të njohur të botës së krimit, të cilët u përfshinë në dosjen “Revanshi”, lidhur me një sërë ngjarjesh kriminale të zbardhura gjatë vitit 2020.
GJKKO jep 50 vite burg, ja sa dënohen Durim Bami, Aldo Avdyli e Altin Morina…
Në qendër të vendimit është Durim Bami, i njohur si “i forti i Niklës”, ndaj të cilit GJKKO vendosi 10 vite e 8 muaj burg, me gjykim të shkurtuar. SPAK kishte kërkuar 14 vite burg.
Bami u shpall fajtor për tentativën për vrasjen e ish-deputetit të Partisë Socialiste, Arben Ndoka, si edhe për kultivim narkotikësh në kuadër të grupit të strukturuar kriminal. Ndërkohë, gjykata e shpalli të pafajshëm për akuzën e tentativës për vrasjen e Tori Xheçukës dhe Erigers Mihasit, për të cilën ishte akuzuar nga SPAK.
Nga ana tjetër, Jozi Kraja dhe Aldo, nipi i Astrit Avdylajt, të akuzuar se kishin siguruar kushtet dhe mjetet për vrasjen e Durim Bamit, u dënuan me nga 4 vite e 8 muaj burg secili. Për ta, SPAK kishte kërkuar nga 6 vite e 8 muaj burg, me gjykim të shkurtuar. Të dy u shpallën fajtorë për sigurimin e kushteve dhe mjeteve për vrasje dhe pjesëmarrje në grup të strukturuar kriminal.
Oltion Zefi u dënua me 10 vite burg, ndërsa akuza e SPAK ishte për 13 vite e 4 muaj burg pas gjykimit të shkurtuar. Ai u shpall fajtor për trafikim narkotikësh dhe organizim të grupit të strukturuar kriminal.
Për Edson Jozwikun, i akuzuar për trafik ndërkombëtar droge, GJKKO vendosi 8 vite burg. SPAK kishte kërkuar 10 vite pas gjykimit të shkurtuar. Jozwik u shpall fajtor për trafikim narkotikësh dhe pjesëmarrje në grup të strukturuar kriminal.
Ish-polici Henerigert Mitri u dënua me 5 vite e 4 muaj burg, me gjykim të shkurtuar. SPAK kishte kërkuar 6 vite burg. Mitri u shpall fajtor për kultivim narkotikësh, pjesëmarrje në grup të strukturuar kriminal dhe shpërdorim detyre.
Ndërkohë, ish-efektivi i RENEA-s, Altin Morina, u dënua me 6 vite e 8 muaj burg, nga 9 vite që kishte kërkuar SPAK. Ai u shpall fajtor për kultivim narkotikësh, pjesëmarrje në grup të strukturuar kriminal dhe mbajtje pa leje të armëve. Për akuzën e mbajtjes së municioneve luftarake, çështja u pushua.
Hetimet e dosjes “Revanshi” kanë zbardhur një sërë ngjarjesh kriminale të lidhura me shtatë grupe kriminale, me veprimtari në qytete të ndryshme të vendit, përfshirë Lezhën, Durrësin, Krujën, Tiranën, Vlorën dhe Burrelin.
Jozi Kraja 7 vite burg, me gjykim të shkurtuar zbret në 4 vite e 8 muaj burg
Aldo Avdylaj (alias Elidon Avdyli) 7 vite burg, me gjykim të shkurtuar zbret në 4 vite e 8 muaj burg
Oltion Zefi 15 vite burg, me gjykim të shkurtuar zbret në 10 vite burg
Edson Jozwik (alias Edson Pjetri, alias Edmir Pjetri) 12 vite burg, me gjykim të shkurtuar zbret në 8 vite burg
Henerigert Mitri 8 vite burg, me gjykim të shkurtuar zbret në 5 vite e 4 muaj burg
Durim Bami 16 vite burg, me gjykim të shkurtuar zbret në 10 vite e 8 muaj burg
Altin Morina 10 vite burg, me gjykim të shkurtuar zbret në 6 vite e 8 muaj burg
