Historia e Alket Rizait, shqiptarit të dënuar për vrasje dhe një prej të burgosurve më të njohur për arratisjet e bujshme në Greqi, është rikthyer në fokusin e mediave greke. Shkak janë bërë lejet e shumta të daljes nga burgu që ai ka marrë gjatë viteve të fundit. Sipas raportimeve të mediave greke, vetëm nga viti 2021 Rizai ka përfituar 16 leje, pavarësisht precedentëve të tij dhe dy arratisjeve spektakolare me helikopter nga burgu i Korydallos.
Numri i lejeve ka hapur debat në Greqi lidhur me mënyrën se si funksionon procedura për dhënien e tyre dhe kriteret që merren parasysh për të burgosurit me histori të rëndë kriminale. Në sistemin penitenciar grek, kërkesa për leje shqyrtohet nga këshilli kompetent i burgut.
Lexo edhe: Alketa Rizai në beach bar-in ku ndodhi përleshja e përgjakshme
Në vlerësim merren parasysh sjellja e të dënuarit, qëndrimi i tij gjatë vuajtjes së dënimit dhe mënyra se si ka respektuar kushtet e lejeve të mëparshme. Vendimi merret më pas në përputhje me procedurat ligjore përkatëse, ku rol ka edhe prokurori. Rasti i Rizait është bërë sërish aktual pas një incidenti të raportuar gjatë lejes së tij të fundit. Sipas mediave greke, shqiptari dyshohet se u përfshi në një episod me armë jashtë një lokali në zonën e Saronidës. Pas ngjarjes, autoritetet greke kanë nisur kërkimet për të përcaktuar vendndodhjen e tij.
Dy arratisje që tronditën burgjet greke
Emri i Alket Rizait u bë i njohur gjerësisht në Greqi pas dy arratisjeve nga burgu i Korydallos, të dyja të realizuara me helikopter. Arratisja e parë ndodhi më 4 qershor 2006. Rizai doli nga burgu së bashku me Vasilis Paleokostas, një prej personave më të kërkuar në Greqi në atë periudhë. Mënyra e arratisjes shkaktoi reagime të forta dhe ngriti pikëpyetje të mëdha për masat e sigurisë në burgun e Korydallos.
Tre vjet më vonë, më 22 shkurt 2009, historia u përsërit. Rizai dhe Paleokostas u larguan sërish me helikopter nga i njëjti burg, duke e vënë edhe një herë sistemin penitenciar grek në qendër të kritikave. Rizai u arrestua më vonë në zonën e Grammatiko, së bashku me një bashkëpunëtor. Pavarësisht historisë së tij, fakti që ai ka marrë një numër të konsiderueshëm lejesh vitet e fundit ka rikthyer debatin në Greqi mbi kriteret dhe kontrollet që zbatohen për dhënien e daljeve të përkohshme nga burgu. Ndërkohë, pas incidentit të fundit të raportuar në Saronidë, autoritetet vijojnë kërkimet për gjetjen e tij.
