Operacioni për sekuestrimin e 41 kilogramë e 350 gramë kokainë në Portin e Durrësit, i bërë publik nga Policia e Durrësit një goditje ndaj trafikut ndërkombëtar të drogës, rezulton të jetë pjesë e një hetimi më të gjerë ndërkombëtar, të koordinuar nga Europol dhe autoritetet belge dhe të ndjekur prej tyre nga nisja deri te mbërritje në portin e Durrësit.
Burime pranë hetimit bëjnë me dije se lënda narkotike nuk është zbuluar rastësisht në portin shqiptar nga Policia e Durrësit. Sipas të dhënave të administruara gjatë hetimit, ngarkesa me kokainë është ndjekur përgjatë itinerarit të saj ndërkombëtar për rreth 38 ditë, duke kaluar në disa porte përpara se të mbërrinte në Shqipëri.
EKSKLUZIVE/ Kokaina e kapur në Durrës i përkiste grupit ku bënte pjesë Gjenerali
Kjo do të thotë se lëvizja e ngarkesës ka qenë në vëmendjen e autoriteteve të huaja gjatë gjithë itinerarit, ndërsa destinacioni final i saj ka qenë Shqipëria. Operacioni në Durrës është zhvilluar në kuadër të këtij hetimi ndërkombëtar dhe në koordinim me autoritetet belge dhe strukturat europiane të zbatimit të ligjit.
Në Portin e Durrësit, kokaina u gjet e fshehur në pjesët e jashtme të një kontejneri që transportonte mish pule nga Brazili. Brenda kapakëve të kontejnerit u zbuluan 37 pako me kokainë, të mbështjella me ngjyra të ndryshme. Vlera e drogës në treg, sipas përllogaritjeve paraprake, arrin në rreth 2 milionë euro.
Ngarkesa ishte porositur nga kompania AMG Food. Përfshirja ose jo e kompanisë në trafikun e drogës mbetet për t’u përcaktuar nga hetimi dhe nuk përbën aktualisht një fakt të provuar.
Në të njëjtën kohë, autoritetet belge zhvilluan një operacion në Antwerp dhe Bruksel, ku u arrestuan tetë persona, shumica prej tyre shqiptarë. Mes personave ndaj të cilëve u vendosën masa sigurie është edhe Gerd Gjinarari, i njohur me nofkën “Gjenerali”, një emër i njohur i botës së krimit shqiptar të viteve ’90.
Të dhënat e hetimit sugjerojnë se sekuestrimi në Durrës dhe operacioni në Belgjikë janë pjesë e së njëjtës dosje kriminale. Ndjekja e ngarkesës për 38 ditë dhe kalimi i saj në disa porte dyshohet se ka qenë pjesë e një operacioni të kontrolluar nga autoritetet europiane, me qëllim identifikimin e personave dhe strukturave që qëndrojnë pas trafikut.
Në këtë kuadër, roli i Policisë së Durrësit ka qenë ai i ndërhyrjes dhe sekuestrimit të ngarkesës në territorin shqiptar, ndërsa hetimi më i gjerë është zhvilluar në bashkëpunim dhe nën koordinimin e autoriteteve belge dhe Europol.
Pikërisht kjo e bën rastin e Durrësit më shumë se një sekuestrim të zakonshëm droge: bëhet fjalë për një operacion ndërkombëtar, ku lëvizja e kokainës dyshohet se është monitoruar përpara se ngarkesa të mbërrinte në Shqipëri dhe të bëhej ndërhyrja në Portin e Durrësit./InfoNews.al
