Zjarri masiv që shkrumboi dje një prej godinave të kompleksit ‘Arlis’ në zonën e njohur si ‘Farmacia 10’ në kryeqytet, ka lënë pas hi, dhimbje e lot në sytë e banorëve. Rreth 30 banesa janë prekur nga flakët, ndërsa dyshohet se shkaku kryesor për përhapjen e flakëve nga kati zero deri katin e 12 (i fundit i ndërtesës) është materiali i fasadës. Dëmet përllogariten të mëdha ndërsa në orët në vijim pritet të bëhet bilanci i plotë.
Dyshohet se zjarri ka nisur nga plehrat e marketit (kryesisht kartonë) të lëna jashtë shumë afër me fasadën e pallatit. Policia ka arrestuar menaxheren e marketit e akuzuar për “Shkatërrim i pronës nga pakujdesia” dhe “Shkelje e rregullave të mbrojtjes në punë”.Në pranga ka rënë dhe administratori i pallatit Agron Cara, kontraktori i fasadës Altin Furtuna dhe inixhineri i kompanisë ndërtuese ‘Arlis’ Enver Ademi, të akzuar për “Shkelje të rregullave të mbrojtjes në punë”. Ndërkohë nën hetim është vënë pronari i kompanisë ‘Arlis’ Armando Lilo, i kontraktuari për ndërtimin e kompleksit ‘Arlis’ Sh, B., dhe 2 punonjëse të marketit.
Ndaj menaxheres së marketit është ngritur akuzë pasi nuk ka marrë masa për heqjen e mbeturinave të kartonit të grumbulluara në pjesën e jashtme. Ndërkohë administratori i pallatit akuzohet se nuk ka marrë masa për funksionalitetin e masave mbrojtëse për shpëtimin e qytetarëve dhe mbrojtjes nga zjarri.
