Sarandë – Pas vrasjes së ndodhur mëngjesin e sotëm në qendër të Sarandës, ku një 44-vjeçar u ekzekutua me armë zjarri dhe një 73-vjeçar mbeti i plagosur, situata kriminale në qytet ka vënë në lëvizje strukturat më të larta të Policisë së Shtetit.
Drejtori i Përgjithshëm i Policisë së Shtetit, Skënder Hita, ka mbërritur në Sarandë, ku raportohet se po zhvillon një mbledhje urgjente me drejtuesit vendorë të policisë dhe grupet hetimore, në funksion të zbardhjes së ngjarjes dhe kapjes së autorëve.
Vrasja ndodhi rreth orës 09:55, në zonën e ish-agjencisë, në qendër të qytetit. Sipas njoftimit zyrtar të Policisë, viktimë mbeti shtetasi Artan Myftari rreth 44 vjeç, ndërsa i plagosur mbeti një kalimtar i rastit, Xh. S., 73 vjeç, i cili u transportua në spital për ndihmë mjekësore.
Autorët u larguan nga vendi i ngjarjes menjëherë pas të shtënave. Policia ka ngritur pika kontrolli në drejtim të Vlorës dhe Gjirokastrës, ndërsa grupi hetimor, nën drejtimin e Prokurorisë, po punon për identifikimin dhe kapjen e autorëve.
Mbërritja e kryepolicit Hita në Sarandë vjen në një moment kur qyteti është përfshirë nga një situatë e rëndë kriminale, ndërsa hetimet vijojnë për të përcaktuar motivin, autorët dhe dinamikën e atentatit.
Pritet që në përfundim të mbledhjes të ketë detaje të reja mbi operacionin policor dhe hetimet për ngjarjen.
