Grupi hungarez 4iG, kompania mëmë e One Albania, pritet të mbajë një mbledhje të jashtëzakonshme të aksionarëve më 30 tetor, në një periudhë kur kompania po përballet me shqyrtimin e kontratave të saj shtetërore në Hungari dhe me ndryshime në organet drejtuese.
Sipas njoftimit zyrtar të publikuar në bursën e Budapestit, mbledhja do të shqyrtojë çështje që lidhen me organet drejtuese dhe mbikëqyrëse të kompanisë, përfshirë zgjedhjen e anëtarëve të rinj.
Kaos te pronarët e One Albania, Plasin largimet e drejtuesëve te 4iG
Mbledhja vjen pas dy largimeve të njoftuara në fund të shtatorit dhe në fillim të tetorit. Këto zhvillime e bëjnë mbledhjen e 30 tetorit një moment të rëndësishëm për të kuptuar përbërjen e ardhshme të drejtimit të grupit. Po ashtu sipas mediave hungareze, takimi pritet të sjellë një ristrukturim të të gjithë 4iG, por edhe kompanive në varsi të tyre.
4iG njofton mbledhje urgjente ristrukturimi! Në pikëpyetje edhe drejtimi te One Albania
Për Shqipërinë, interesi lidhet me faktin se 4iG është kompania mëmë e One Albania, një prej operatorëve kryesorë të telekomunikacionit në vend. Pritet të shihet nëse ndryshimet në drejtimin e grupit do të shoqërohen me ndryshime në strukturën drejtuese ose organizative të One Albania.
Megjithatë, mbetet për t’u parë nëse vendimet e aksionarëve do të sjellin riorganizim të menaxhimit, ndryshim të prioriteteve strategjike ose rishikim të mënyrës se si grupi administron aktivitetet e tij në tregjet ku operon.
Aktualisht, One Albania drejtohet nga Barna Kutvolgyi, në pozicionin e drejtorit ekzekutiv (CEO), ndërsa Tamas Tabori mban pozicionin e kryetarit të bordit të kompanisë. One Albania është pjesë e grupit hungarez 4iG, i cili kontrollon aktivitetet e saj në kuadër të strategjisë rajonale të telekomunikacionit. Ndër vite, operatori ka qenë në qendër të kritikave nga abonentët për rritjen e tarifave, ofertat e konsideruara të shtrenjta dhe mundësitë e kufizuara për të zgjedhur paketa më ekonomike.
Këto shqetësime janë reflektuar edhe në nivel institucional: në korrik 2026, Autoriteti i Konkurrencës mbylli hetimin e thelluar ndaj One Albania dhe Vodafone Albania për tregun me pakicë të telefonisë celulare, duke vendosur detyrime për transparencë më të madhe, oferta më të favorshme për studentët dhe pensionistët, si dhe lehtësimin e kalimit drejt paketave më të lira. Autoriteti evidentoi rritje të ngjashme të çmimeve, ngjashmëri të lartë mes paketave dhe pakësim të ofertave me çmime të ulëta.
Një tjetër çështje delikate që lidhet me mënyrën e drejtimit dhe punonjësve të One Albania, të kthen pas në kohë. Gjatë operacionit antidrogë “Labirinti 2”, i zhvilluar në Tiranë në dhjetor 2025. Sipas raportimeve të mediave shqiptare, mes 22 personave të arrestuar ishin edhe Erald Sina, i identifikuar si drejtues i Departamentit të Zyrave dhe Pasurisë në One Albania, dhe Artan Pullazi, i identifikuar si Team Leader në kompani. Të dy u raportuan si të dyshuar në një hetim për një rrjet të shpërndarjes së lëndëve narkotike.
