Ishte mbrëmja e 8 korrikut, kur 23-vjeçari nga Dibra, Renis Dobra u rrëmbye dhe u vra me litar. 8 ditë pas vrasjes që tronditi jo vetëm fshatin e vogël Madhesh të Matit, por të gjithë vendin, zbulohen detaje të reja që hedhin dritë mbi vrasjen e të riut. Tre vëllezër nga Tropoja, me banim në Kamëz, dyshohet se fshihen pas ngjarjes së rëndë kriminale.
Të tre vëllezërit Bushgjoka, personazhe të njohur për Policinë, dyshohet se në bashkëpunim me njëri-tjetrin kanë organizuar rrëmbimin dhe vrasjen e 23-vjeçarit Dobra, të cilin pasi e vranë me litar e hodhën bashkë me makinën e tij buzë liqenit të Shkopetit. Në ndihmë kanë pasur edhe persona të tjerë, ndërsa hetimet e bluve deri më tani kanë çuar në pranga 2 persona, 2 janë shpallur në kërkim dhe 4 janë shoqëruar.
Dëshmitë dhe pamjet e kamerave të sigurisë kanë çuar grupin hetimor në drejtim të tre vëllezërve nga Tropoja.
Në pranga ka rënë Fatjon Bushgjokaj, ndërsa në kërkim janë shpallur dy vëllezërit e tij Kristi dhe Aleksandër Bushgjokaj. Po ashtu, blutë kanë arrestuar edhe një tjetër bashkëpunëtor, Petrit Çakrri banues në Tropojë, i cili rezulton të jetë edhe një prej dëshmitarëve okularë të vrasjes së ish-deputetit të PD-së, Azem Hajdari më 12 shtator 1998.
Fatjon Bushgjoka është arrestuar në zonën e Astirit, Çakrri është kapur në Kukës, ndërsa dy vëllezërit e tjerë janë ende në kërkim. Një prej tyre akuzohet për përkrahje të autorit të krimit pasi rezulton se ka dërguar në Kosovë 2 vëllezërit e tjerë pas ngjarjes.
Eliminimi i 23-vjeçarit është vënë në jetë pas një plani të mirëmenduar. Fillimisht autorët e dyshuar të ngjarjes e kanë mbajtur të riun në vëzhgim. Për 3 ditë me radhë e kanë ndjekur në zonën e Burrelit deri kur mbrëmjen e 8 korrikut e morën peng dhe pasi e mbytën me litar e hodhën në Liqenin e Shkopetit. Për të mos lenë gjurmë, autorët janë kujdesur që të marrin makina me qira, por plani duket se nuk u shkoi ashtu siç e menduan. Policia ka rënë në gjurmët e mjeteve, duke zbuluar edhe dyqanet ku janë marrë me qira në zonën e Rinasit dhe atë të Yzberishtit.
Mjetet i kanë ndërruar disa herë, ndërsa arrituri të sigurojë foto e dy prej tyre, një mjet i zi tip Range Rover dhe një tjetër i bardhë që është përdorur nga autorët natën e rrëmbimit.
Pista e hetimit janë konfliktet për trafikun e drogës. Detajet e ngjarjes kriminale u dhanë edhe në një konferencë për shtyp nga drejtori i Policisë së Dibrës, Artion Duka i cili tha se i riu rezulton i dënuar në Gjermani për shpërndarje të lëndëve narkotike dhe dyshohet se me 4 personat e përfshirë në vrasje, kanë pasur mosmarrëveshje në fushën e narkotikëve.
“23-vjeçari ka qenë i dënuar në Gjermani për shpërndarje të lëndëve narkotike, dhe dyshohet se me 4 të sipërpëmendurit ka pasur mosmarrëveshje në fushën e narkotikëve”, tha ai.
Pasi e vranë, autorët e futën trupin e 23-vjeçarit në makinë dhe e hodhën në Liqenin e Shkopetit me qëllim për të fshehur ngjarjen, por trupi i pajetë i të riut ka dalë jashtë, ndërsa mjeti përfundoi në ujë. Ndaj Petrit Çakrri rëndojnë akuzat “Vrasja me paramendim”, kryer në bashkëpunim, dhe “Rrëmbimi dhe mbajtja peng e personit”, ndërsa Fatjon Bushgjoka akuzohet për “Vrasja me paramendim”, kryer në bashkëpunim, dhe “Rrëmbimi dhe mbajtja peng e personit”.
34-vjeçari Bushgjoka rezulton emër i njohur për policinë, pasi është proceduar dhe dënuar disa herë për vjedhje në Shqipëri, shpërndarje droge, vjedhje dhe tregti droge në Itali, mbajtje pa leje të armëve e municioneve, kundërshtim të forcave të rendit. Në tetor të vitit 2019, ai u arratis nga burgu i Rrogozhinës, ku po vuante një dënim me 6 vite burg për vjedhje me dhunë të kryer në bashkëpunim. Në pranga asokohe kishin rëndë edhe dy vëllezërit e tij.
Policia gjatë periudhës hetimore ka sekuestruar 20 celularë, 7 automjete, një shumë eurosh, një sasi lënde narkotike Kokainë, si dhe prova të tjera të cilat do t’i shërbejnë hetimeve.
Të arrestuar
Fatjon Bushgjokaj
Petrit Çakrri
Në kërkim
Kristi Bushgjokaj
Aleksandër Bushgjokaj
