Emrat/ 16 protestues të arrestuar dhe 49 nën hetim.
9 orë dhunë në rrugët e Tiranës, protestuesit e maskuar sulmuan institucione, shkatërruan biznese dhe u përplasën me Policinë. 16 persona u arrestuan dhe 20 mbetën të lënduar, mes tyre një 19-vjeçar me këmbë të thyer. Një grup i posaçëm do të hetojë veprimet e efektivëve gjatë gjithë protestës.
16 persona kanë përfunduar në pranga dhe 49 të tjerë janë vënë nën hetim pas 9 orësh dhunë dhe shkatërrimi në rrugët e Tiranës. Nga sulmet ndaj Ministrisë së Arsimit dhe Bashkisë së Tiranës, te bizneset e bankomatet e shkatërruara, koshat e mbeturinave në flakë dhe përplasjet me Policinë, kryeqyteti u përfshi nga akte të dhunshme dhe vandalizmi.
Protagonistë ishin grupe protestuesish me fytyra të mbuluara. Ndonëse protestuesit ishin kamufluar si studentë, më i riu në pranga është 23 vjeç, ndërsa të tjerët janë nga 27 deri në 59 vjeç. Mes tyre ka edhe persona të moshave 48, 52, 55 dhe 57 vjeç.
Ndaj të arrestuarve rëndojnë 8 vepra penale, “Goditje për shkak të detyrës”, “Prishja e rendit dhe qetësisë publike”, “Shkelja e rregullave mbi lëndët plasëse dhe djegëse”, “Vjedhja e bankave dhe arkave të kursimit”, “Shkatërrimi i pronës”, “Shkatërrimi i pronës me zjarr”, “Kundërshtimi i punonjësit të rendit publik” dhe “Prodhimi, mbajtja, blerja apo shitja pa leje e armëve të ftohta”.
