Protesta e së shtunës në Tiranë, e organizuar nga studentë dhe protestues që kërkojnë largimin e kryeministrit Edi Rama, u shoqërua me përplasje të dhunshme mes protestuesve dhe efektivëve të Policisë së Shtetit. Sipas të dhënave të raportuara, mbi 70 persona, mes tyre studentë, protestues dhe punonjës policie, mbetën të lënduar gjatë përleshjeve.
Ka humbur Ervin Demo!
Situata në terren u tensionua ndjeshëm, ndërsa përplasjet dhe hedhja e gurëve shkaktuan dëmtime edhe në radhët e drejtuesve të policisë. Mes të lënduarve ishte edhe Drejtori i Policisë së Tiranës, i cili të shtunën qëndroi në terren gjatë gjithë zhvillimit të protestës, së bashku me Drejtorin e Përgjithshëm të Policisë së Shtetit, Skënder Hita.
Por, përtej bilancit të të lënduarve dhe tensioneve në rrugët e kryeqytetit, vëmendjen e ka tërhequr edhe mungesa e një reagimi të ri publik nga ministri i Brendshëm, Ervin Demo.
Reagimi i fundit i ministrit daton më 16 tetor, në orën 18:00. Që prej asaj kohe, ndërsa protesta e së shtunës u shoqërua me përplasje të forta dhe rrezik për sigurinë e protestuesve, qytetarëve dhe efektivëve të policisë, nuk është evidentuar një tjetër reagim publik prej tij.
Heshtja e ministrit ngre pikëpyetje mbi qëndrimin e tij për situatën e krijuar, ndërsa deri më tani nuk ka një informacion të konfirmuar publikisht mbi arsyet e mungesës së reagimit të tij apo mbi angazhimin e tij gjatë këtyre zhvillimeve, dhe nëse ende vijon të jetë në detyrë.
Ndërkohë, nga Ministria e Brendshme ka reaguar zëvendësministrja Anisa Ruseti. Në deklaratën e saj, ajo u është drejtuar kryesisht të miturve, duke u bërë thirrje të qëndrojnë larg protestave. Mesazhi i saj u fokusua te siguria e fëmijëve dhe roli i prindërve për t’i mbajtur ata larg situatave të rrezikshme.
Megjithatë, deklarata nuk i dha përgjigje të drejtpërdrejta pikëpyetjeve që lidhen me përmasat e përplasjeve, numrin e të lënduarve dhe qëndrimin e ministrit të Brendshëm pas ngjarjeve të së shtunës.
Ervin Demo ka qenë aktiv në kërkimin e pezullimeve të efektivëve të policisë kur ka pasur shkelje të ligjit, por kur në terren plagosen studentë, protestues dhe vetë punonjësit e policisë, ministri vijon të mos reagojë publikisht. A po pret Ervin Demo të ndodhë një tjetër incident apo të bëhet një tjetër gabim nga policia që të dalë më në fund me një qëndrim zyrtar? Heshtja e tij, në një situatë të tillë, kërkon shpjegim.
Kur në rrugët e Tiranës plagosen studentë, qytetarë dhe efektivë policie, pyetja që kërkon përgjigje është e pashmangshme: Ku është ministri i Brendshëm, Ervin Demo? Në një moment kur siguria e qytetarëve dhe e punonjësve të policisë vihet në rrezik, publiku pret më shumë se një deklaratë të shkurtër nga zëvendësministrja. Pret një qëndrim të qartë, transparencë dhe përgjegjësi institucionale. Sepse kur dhjetëra persona mbeten të lënduar dhe situata në kryeqytet përshkallëzohet, heshtja e drejtuesve të institucioneve nuk i shuan pikëpyetjet, por i shton ato. Përballë një bilanci të tillë, pyetja mbetet: pse ministri nuk ka dalë ende për të dhënë shpjegime dhe për të informuar qytetarët për situatën?
