Policia e Tiranës ka vijuar aksionin për goditjen e grupit të dyshuar për shpërndarjen e lëndëve narkotike pranë shkollave 9-vjeçare dhe gjimnazeve në kryeqytet.
Ditën e sotme është arrestuar 28-vjeçari Orges Ferazini, i cili ishte shpallur në kërkim në kuadër të operacionit të koduar “Shkolla të pastra”. Sipas Policisë, ai u lokalizua dhe u arrestua gjatë ndërhyrjes në banesën e tij në rrugën “Rreshit Petrela”.
Gjatë kontrollit në banesë, efektivët sekuestruan dy armë zjarri pistoletë dhe municion luftarak, të cilat dyshohet se i posedonte pa leje. Po ashtu, iu gjetën 363 gramë lëndë e dyshuar narkotike kokainë, e ndarë në 235 doza, që dyshohet se do të shitej, si dhe një peshore elektronike.
Ferazini ishte një prej 14 personave të shpallur në kërkim në kuadër të hetimeve për një rrjet të dyshuar të shpërndarjes së heroinës, kokainës dhe hashashit pranë shkollave të Tiranës.
Sipas të dhënave të bëra publike nga Policia, në pranga janë vënë edhe persona të tjerë të dyshuar për përfshirje në aktivitetin kriminal. Mes tyre janë Genti Jaupi, Endrit Balla, Eduart Oleff, Bledar Kasa, Erlind Vlashi, Denis Shoti, Armando Koçi, Ernest Hamollari, Janaq Nakuçi, Shpëtim Çiçiku, Engrid Hënaj, Enis Maliqaj, Franci Papajani, Klement Metallari, Ram Tafaj, Klajdi Malaj, Isuf Dine, Ferit Xhani, Bestar Malaj, Igli Avxhi, Arnold Lila, Sefer Allushi, Elton Tola, Arbias Prenga, Vilson Mete, Durim Matja, Eljado Prendaj, Armando Kuqi, Taulant Alstafa dhe Volf Ramadani.
Për Orges Ferazinin, Gjykata e Tiranës ka caktuar masën e sigurisë “Arrest në burg”, për veprën penale “Prodhimi dhe shitja e narkotikëve”.
Ndërkohë, Policia vijon kërkimet për lokalizimin dhe arrestimin e 13 personave të tjerë, të cilët, sipas hetimeve, dyshohet se janë përfshirë në shitjen e lëndëve narkotike pranë shkollave dhe gjimnazeve në Tiranë.
Hetimet për këtë operacion vijojnë.
