Valentin Ftoni, 52 vjeç, u arrestua në SHBA pas një operacioni të përbashkët mes Policisë së Shtetit dhe agjencive federale amerikane. Autoritetet shqiptare po punojnë për ekstradimin e tij.
Një 52-vjeçar shqiptar, i dënuar dy herë me nga 25 vite burg për tri vrasje të kryera në qarkun e Shkodrës, është arrestuar në Nju-Jork të Shteteve të Bashkuara të Amerikës. Bëhet fjalë për Valentin Ftonin, i cili ishte shpallur në kërkim ndërkombëtar nga autoritetet shqiptare që prej vitit 2001.
Sipas njoftimit të Policisë së Shtetit, arrestimi u bë i mundur pas një pune të gjatë hetimore dhe bashkëpunimit mes strukturave shqiptare dhe tri agjencive federale amerikane: DSS/OCIU, Shërbimit të Marshallëve të SHBA-së (USMS) dhe Agjencisë së Emigracionit dhe Doganave (ICE).
Hetimet dhe koordinimi mes autoriteteve çuan në identifikimin dhe lokalizimin e 52-vjeçarit në territorin amerikan, ku dyshohet se kishte hyrë në mënyrë të paligjshme, duke përdorur dokumente të dyshuara të falsifikuara dhe disa identitete të rreme.
I dënuar për tri vrasje në Shkodër
Sipas të dhënave të bëra publike nga Policia e Shtetit, Valentin Ftoni është dënuar në dy procese të veçanta gjyqësore nga Gjykata e Rrethit Gjyqësor Shkodër.
Më 28 shtator 2001, ai u shpall fajtor dhe u dënua me 25 vite burg për vrasjen me paramendim, në bashkëpunim, si dhe për veprat penale që lidhen me armëmbajtjen pa leje. Sipas vendimit, më 19 shtator 2000, në Ças të Velipojës, ai kishte vrarë Gjelosh dhe Ardiana Markajn, për motive gjakmarrjeje.
Ndërsa më 18 nëntor 2008, Ftoni u dënua sërish me 25 vite burg për vrasjen me paramendim të Gac Tomës, ngjarje e ndodhur më 12 gusht 2001, si dhe për veprat penale që lidhen me armët.
Vijojnë procedurat për ekstradimin
Pas arrestimit në SHBA, Policia e Shtetit bën me dije se po vijon koordinimin me partnerët amerikanë për përfundimin e procedurave të ekstradimit të Valentin Ftonit drejt Shqipërisë, me qëllim vuajtjen e dënimeve të dhëna nga drejtësia shqiptare.
Në njoftimin zyrtar, Policia e Shtetit vlerëson bashkëpunimin me Ambasadën e SHBA-së në Shqipëri dhe agjencitë federale amerikane, duke e cilësuar operacionin si një tjetër rezultat të koordinimit ndërkombëtar në luftën kundër kriminalitetit.
