“O Mand Duka si të kam…Tao jam, më duhet një 100-çe Bitcoin”/ Si u zbulua skema e dy të rinjve.
Dy të rinj, Edison Korra, 24 vjeç dhe Orest Balla, 23 vjeç, janë arrestuar në Tiranë pasi janë përpjekur të mashtrojnë kreun e FSHF, Armand Dukën, për t’i marrë 100 mijë euro.
Dy të arrestuarit kanë komunikuar me Armand Dukën, duke iu prezantuar si Taulant Balla, me qëllim përfitimin e 100 mijë eurove në kriptovaluta. Biznesmeni e ka kuptuar se bëhej fjalë për një tentativë mashtrimi dhe ka njoftuar menjëherë policinë.
Gjatë komunikimit me autorët, Duka u ka thënë se nuk merrej me transaksione të tilla dhe i ka orientuar që të lidheshin me djalin e tij, pasi, sipas tij, ai merrej me këto çështje. Në telefonin e dy të arrestuarve ka komunikuar më pas një agjent i infiltruar i policisë, i cili është prezantuar si djali i Armando Dukës. Agjenti u ka bërë të ditur mashtruesve se paratë nuk mund t’i dërgonte në kriptovaluta, por do t’ua dorëzonte në cash.
Dy autorët kanë pranuar dhe i kanë kërkuar që paratë t’ua dorëzonte në Elbasan. Policia ka organizuar më pas operacionin për kapjen e tyre në flagrancë. Në momentin e dorëzimit të shumës së parave, efektivët kanë ndërhyrë dhe kanë arrestuar dy të rinjtë. Njëri prej tyre ka tentuar të largohet me vrap, por është ndjekur dhe kapur nga efektivët e policisë.
Sipas burimeve, dyshohet se pas kësaj ngjarjeje fshihet Florian Gjergji, emri i të cilit është lakuar në episode të ndryshme mashtrimi.
Autorët:
– Përshëndetje, jemi Taulant Balla. Kemi një çështje që lidhet me një transaksion në kriptovaluta.
Armand Duka:
– Unë nuk merrem me këto transaksione. Mund të komunikoni me djalin tim, ai merret me këto çështje.
Agjenti i infiltruar:
– Përshëndetje, jam djali i Armandit. Më kanë thënë se keni një transaksion për të kryer.
Autorët:
– Po. Bëhet fjalë për rreth 100 mijë euro dhe duhet të kryhet në kriptovaluta.
Agjenti:
– Nuk mund t’i dërgoj në kriptovaluta. Nëse është në rregull, mund t’jua dorëzoj shumën cash.
Autorët:
– Në rregull. Ku mund të bëhet dorëzimi?
Agjenti:
– Më thoni ju vendin.
Autorët:
– Në Elbasan.
Agjenti:
– Dakord. Do të biem dakord për vendin dhe orën.
Pas takimit të përcaktuar, policia ndërhyri dhe arrestoi dy të rinjtë në flagrancë.
