Kanë kaluar 74 ditë nga vendimi i Komisionit të Konkurrencës që detyron Vodafone Albania dhe One Albania të ndërmarrin një sërë masash në favor të konsumatorëve, ndërsa afati 90-ditor i përcaktuar për disa prej detyrimeve po shkon drejt fundit.
One dhe Vodafone Albania
Vendimi nr. 1307, datë 24 korrik 2026, erdhi pas një hetimi të thelluar të Autoritetit të Konkurrencës në tregun me pakicë të shërbimeve celulare. Autoriteti konstatoi, ndër të tjera, rritje progresive dhe të përafërta të çmimeve, ngjashmëri të lartë mes paketave, reduktim të ofertave me çmime të ulëta dhe mangësi në dokumentimin e kostove që justifikojnë ndryshimet tarifore.
Vepruan si “kartel” me çmimet e ofertave! Goditet One Albania dhe Vodafone: 90 ditë afat
Mes masave të vendosura është detyrimi që të dy operatorët, brenda 90 ditëve, të ofrojnë paketa të veçanta dhe më të favorshme për pensionistët dhe studentët 18–23 vjeç.
Po ashtu, Autoriteti ka përcaktuar se paketa më e lirë duhet të jetë realisht e disponueshme edhe në pikat fizike të shitjes dhe jo vetëm në aplikacione apo kanale digjitale. Operatorët duhet gjithashtu t’u japin abonentëve mundësinë për të kaluar në një paketë më të lirë pas përfundimit të kontratës, pa penalitete apo pengesa të pajustifikuara.
Megjithatë, 74 ditë pas miratimit të vendimit, në kanalet publike të kompanive nuk janë afishuar në mënyrë të qartë masat e reja të kërkuara nga Autoriteti, përfshirë paketat e veçanta të parashikuara për pensionistët dhe studentët.
Kjo ngre pikëpyetje mbi ecurinë e zbatimit të vendimit, veçanërisht duke pasur parasysh se nga afati 90-ditor kanë mbetur vetëm 16 ditë.
Kompanive iu kërkua transparencë
Vendimi nuk kufizohet vetëm te paketat e reja. Vodafone Albania dhe One Albania duhet gjithashtu të njoftojnë individualisht abonentët, të paktën 30 ditë përpara, për çdo ndryshim në çmim, përmbajtje apo vlefshmëri të paketave.
Çdo rritje çmimi duhet të mbështetet në analiza të dokumentuara të kostove, ndërsa dokumentacioni përkatës duhet të ruhet për një periudhë pesëvjeçare.
Autoriteti ka parashikuar gjithashtu masa për rritjen e transparencës së kontratave dhe për lehtësimin e zgjedhjes së konsumatorit.
A janë zbatuar detyrimet?
Pyetja kryesore tashmë është nëse dy operatorët i kanë përmbushur realisht detyrimet e vendosura nga Autoriteti i Konkurrencës apo nëse një pjesë e tyre mbetet ende për t’u zbatuar.
Për këtë arsye, u jemi drejtuar Vodafone Albania dhe One Albania me kërkesë për të konfirmuar nëse të gjitha detyrimet janë zbatuar plotësisht, pjesërisht apo nëse ka masa ende të pazbatuara, si dhe nëse kompanitë kanë dorëzuar pranë Autoritetit të Konkurrencës dokumentacionin që provon zbatimin.
Përgjigjja e tyre do të jetë thelbësore për të kuptuar nëse vendimi i Konkurrencës ka kaluar nga letra në praktikë.
Ndërkohë, ora po ecën: 74 nga 90 ditët kanë kaluar dhe kanë mbetur vetëm 16 ditë nga afati i përcaktuar për zbatimin e masave.
