Pasagjerët në ankth: çfarë ndodhi me avionin e Wizz Air që u nis nga Tirana
Fluturimi W95704 i kompanisë Wizz Air, i nisur nga Aeroporti Ndërkombëtar i Tiranës drejt Londrës, ka kryer një ulje emergjente në Basel të Zvicrës mbrëmjen e djeshme mëson skyweb.al.
Sipas të dhënave të publikuara në platformën e monitorimit ajror Flightradar, avioni ka pësuar një humbje të shpejtë lartësie gjatë devijimit për në Aeroportin e Baselit.
Avioni ishte planifikuar të nisej në orën 18:50, por u ngrit nga Tirana rreth orës 19:40, me gati një orë vonesë.
Gjatë fluturimit mbi hapësirën ajrore të Evropës Qendrore, ai ndryshoi drejtimin dhe u orientua drejt aeroportit të Baselit, ku realizoi ulje emergjente.
Të dhënat e gjurmimit tregojnë se para devijimit, avioni ka humbur lartësi me ritëm të përshpejtuar, çka ka ngritur pikëpyetje mbi arsyet teknike apo operative që çuan në këtë vendim.
Deri në këto momente, nuk ka një komunikim zyrtar mbi shkaqet e incidentit, ndërsa mbetet e paqartë nëse bëhet fjalë për problem teknik, çështje sigurie apo ndonjë emergjencë tjetër në bord.
