Jasin Avdyli, një nga emrat e përfshirë në dosjet e njohura “339” dhe “Volvo 4”, është arrestuar në Belgjikë pas një operacioni të koordinuar mes autoriteteve shqiptare dhe atyre belge. 58-vjeçari rezulton i kërkuar ndërkombëtarisht nga Shqipëria dhe ndaj tij pritet të vijojnë procedurat për ekstradim.
Policia nuk e harron, kapet në Belgjikë Jasin Avdyli
Kapja e tij është bërë e mundur në kuadër të operacionit ndërkombëtar “The Wanted”, në të cilin Interpol Tirana po bashkëpunon me strukturat homologe në vende të ndryshme për lokalizimin e personave të shpallur në kërkim.
Sipas Policisë së Shtetit, J. K., alias J. A., banues në Shijak, u lokalizua në territorin belg pas shkëmbimit të informacionit mes autoriteteve shqiptare dhe belge, në kuadër të një hetimi që lidhet me trafikun e lëndëve narkotike.
Vendimi i GJKKO-së dhe dënimi me 12 vite burg
Emri i Jasin Avdylit është lidhur prej vitesh me hetimet ndaj grupit kriminal të Shijakut dhe operacionin “Volvo 4”.
Vendimi gjyqësor tregon se Gjykata e Posaçme e Apelit, më 4 prill 2023, e deklaroi fajtor për prodhim dhe shitje të narkotikëve në bashkëpunim, në formën e grupit të strukturuar kriminal, si dhe për veprën penale të grupit të strukturuar kriminal.
Për këto vepra, gjykata caktoi për të përkatësisht 10 dhe 2 vite burgim, duke e bashkuar dënimin në 12 vite burgim.
Në njoftimin për arrestimin në Belgjikë, Policia e Shtetit thotë se hetimet kanë ngritur dyshime se grupi kriminal ku dyshohet se ka marrë pjesë Avdyli ka trafikuar sasi të mëdha narkotikësh dhe më pas i ka shitur ato në vende të ndryshme.
Sipas autoriteteve shqiptare, një pjesë e të ardhurave të dyshuara nga aktiviteti kriminal mendohet se është investuar në dy pasuri të paluajtshme, të përshkruara nga Policia si lokale në Shijak.
Këto janë pjesë e të dhënave që autoritetet shqiptare kanë përcjellë në kuadër të procedurave ndërkombëtare të kërkimit.
Çfarë ndodh tani me Avdylin?
Arrestimi në Belgjikë nuk nënkupton kthimin automatik në Shqipëri. Pas ndalimit, vijon procedura ligjore pranë autoriteteve belge për ekstradimin e tij.
Policia e Shtetit ka bërë të ditur se Interpol Tirana po bashkëpunon me homologët belgë për përfundimin e procedurave dhe ekstradimin e të arrestuarit drejt Shqipërisë.
Kapja e Avdylit rikthen në vëmendje një prej dosjeve më të mëdha të trafikut të narkotikëve të hetuara nga autoritetet shqiptare, ndërsa arrestimi në Belgjikë tregon edhe shtrirjen ndërkombëtare të operacioneve për lokalizimin e personave të shpallur në kërkim.
Jasin Avdyli alias Jasin Kala, i njohur ndryshe me pseudonimin “Cine” akuzohet për grup të strukturuar kriminal dhe për trafik droge, si pjesë e grupit të Avdylajve në Shijak. Avdyli ka qënë një ndër të arrestuarit në operacionin “Vol-Vo-4”.
Dosja e përpiluar prej operacionit “Vol- Vo 4” përfshinte një sërë grupesh kriminale nga “Shijaku” e në veri të vendit, ku u implikuan edhe dy ish deputetë të PS-së, ish drejtori i burgjeve Arben Çuko e ish deputeti Arben Ndoka.
Mega Operacioni i koduar “VOL-VO 4”, u shti në 12 qytete, nga Hasi deri në Sarandë, ku u goditën anëtarë nga 4 grupe të skeduara kriminale, në kuadër të operacionit ”Forca e Ligjit”
Ata u akuzuan për trafik droge, grup të strukturuar kriminal, pastrim parash, etj.
Grupi u kap për trafikimin e gati 200 kg lëndë narkotike heroinë dhe një sasie të konsiderueshme hashashi, por nga këto përgjime lindi edhe një tjetër dosje, për dyshime të shit-blerjes së votave në zgjedhjet për bashkinë e Durrësit
