Për vite me radhë, ai dyshohet se ka kontrolluar llogaritë bankare të më shumë se 3,500 klientëve të Intesa Sanpaolo, përfshirë edhe llogaritë e 23 “personave të ekspozuar politikisht”, mes tyre kryeministrja Giorgia Meloni dhe presidenti i Republikës Sergio Mattarella.
Skandali i spiunazhit financiar te Intesa Sanpaolo
Prokuroria e Barit ka përfunduar hetimet ndaj ish-punonjësit të degës së bankës në Bisceglie, 54-vjeçarit nga Bitonto, Vincenzo Coviello, i cili u pushua nga puna në gusht 2024, pasi banka zbuloi veprimtarinë e tij të spiunimit. Së shpejti, prokuroria mund të kërkojë dërgimin e tij në gjyq, duke e akuzuar për hyrje të paautorizuar në sistemin informatik, marrje të paligjshme të informacioneve që lidhen me sigurinë e shtetit, shkelje të shumta dhe sistematike të legjislacionit për mbrojtjen e privatësisë, si dhe zbulim të sekretit zyrtar.
Dështimi i Intesa San Paolo! Si iu vodhën 100 milionë euro nëpërmjet një telefonate ordinere
Pozita e bankës është mbyllur me vendim për mosfillim/mbyllje të procedimit disa muaj më parë. Prokuroria thekson se banka “që nga fazat e para të hetimit ka demonstruar bashkëpunim proaktiv dhe vullnet për transparencë absolute”. Hetuesit kanë konstatuar “përshtatshmërinë e modelit organizativ” dhe “mungesën e dukshme të çdo interesi apo përfitimi të bankës”, e cila, përkundrazi, “ka pësuar një dëm shumë të rëndë”.
Nga viti 2020 deri në vitin 2024, hetuesit e karabinierëve, me ndihmën e ekspertëve teknikë të specializuar në luftën kundër krimit kibernetik dhe nën koordinimin e prokurorit Roberto Rossi dhe prokurores Bruna Manganelli, kanë dokumentuar se punonjësi, duke përdorur kredencialet e tij, dyshohet se ka monitoruar në mënyrë “të fshehtë, sistematike dhe të zgjatur” të dhënat financiare të 3,572 klientëve, në një veprimtari të mirëfilltë “spiunazhi financiar”.
Mes personave të prekur, përveç Melonit dhe Mattarellës, ishte edhe presidenti i Senatit Ignazio La Russa dhe ministri i Mbrojtjes Guido Crosetto. Gjithashtu, në listë ishte edhe Silvio Berlusconi, të dhënat e të cilit dyshohet se janë kontrolluar deri në ditën e vdekjes së tij, më 12 qershor 2023; nënkryetari ekzekutiv i Komisionit Evropian Raffaele Fitto; ish-presidenti i Gjykatës Kushtetuese Giuliano Amato; ish-kryeministri Mario Draghi; ish-zëvendëskryeministri Luigi Di Maio; ish-ministret Carfagna, Santanchè dhe Gelmini; si dhe ish-guvernatori i Bankës së Italisë, Ignazio Visco.
Klientët e Raiffeisen Bank nuk gjejnë qetësi nga sulmet për vjedhjen e parave
“Mbledhja e këtyre të dhënave sensitive ka ekspozuar ndaj një rreziku serioz sigurinë e institucioneve demokratike”, deklaron Prokuroria, duke theksuar se “mbrojtja e sigurisë kibernetike dhe lufta kundër çdo forme të spiunazhit financiar përbëjnë një nevojë absolute dhe të domosdoshme për mbrojtjen e vendit”.
Pozita e shtatë punonjësve të tjerë të bankës, të akuzuar për sjellje të ngjashme, por më pak të rëndësishme, është veçuar dhe dosjet përkatëse u janë dërguar për kompetencë prokurorive të tjera.
Pra, sipas prokurorëve të Barit, bëhet fjalë për një fenomen jo të izoluar, i cili është “shenjë e një cenueshmërie shqetësuese ndaj tundimit të kuriozitetit të paligjshëm ose të mbledhjes së paligjshme të dosjeve dhe informacioneve”.
