Dëshmia e policit: Nuredin Dumani më çau hundën me grusht dhe më ra me kovë

TIRANË – Janë zbardhur detaje të reja nga incidenti i 7 gushtit 2026 në paraburgimin “313” në Tiranë, ku efektivi i Drejtorisë së Mbrojtjes së Dëshmitarëve, Rexhep Sinaj, ka pretenduar se është sulmuar fizikisht nga Nuredin Dumani.

Sipas dëshmisë së dhënë përpara autoriteteve, Sinaj ka deklaruar se paraditen e 7 gushtit po ngjitej drejt katit të dytë të sektorit “C”, ku do të merrte shërbimin. Në duar kishte një qese me ushqime.

Efektivi ka treguar se në korridor është përballur me Nuredin Dumanin, i cili, sipas tij, e ka goditur fillimisht me një kovë me ujë.

“Teksa po ngjisja shkallët drejt katit të dytë, në korridor ka dalë Nuredin Dumani dhe më ka goditur me një kovë uji, duke më lagur të gjithin. Në këtë moment më kanë rënë nga duart edhe ushqimet. Ndërsa Dumani më ka qëlluar edhe me grusht, duke më çarë në pjesën e hundës”, ka deklaruar Sinaj.

Pas incidentit, efektivi është dërguar për ekzaminim pranë Institutit të Mjekësisë Ligjore në Tiranë.

Në dëshminë e tij, Sinaj ka pretenduar gjithashtu se përplasjet me Dumanin kishin nisur më herët dhe nuk ishin të kufizuara vetëm te incidenti i 7 gushtit. Sipas tij, gjatë shërbimit kishte pasur raste kur Dumani e kishte ofenduar rëndë atë dhe familjen e tij. Sinaj ka deklaruar se nuk i ishte përgjigjur me ofendime.

Pas përplasjes fizike, sipas dëshmisë, Dumani është larguar në drejtim të dhomës nr. 1, në katin e dytë të sektorit “C”.

Incidenti i regjistruar nga kamerat
Ngjarja raportohet se është dokumentuar edhe nga kamerat e sigurisë së paraburgimit. Sipas të dhënave të bëra publike, në pamje shfaqet Dumani, i veshur me pantallona të shkurtra dhe me kokën e qethur zero, teksa godet efektivin me kovën e ujit.

Në vijim, në korridor shihen uji dhe ushqimet e shpërndara në dysheme. Në vendngjarje afrohen punonjës policie dhe disa të paraburgosur, ndërsa pas qetësimit të situatës mbyllen dyert e sektorit “C”.

Në lidhje me incidentin janë marrë në pyetje edhe dy punonjësit e Policisë së Burgjeve, Edmond Gjiriti dhe Kujtim Balliu, të cilët kanë qenë dëshmitarë të ngjarjes dhe kanë dhënë versionin e tyre për atë që ka ndodhur.

Ndërkohë, sipas të dhënave të bëra publike, Nuredin Dumani nuk është marrë ende në pyetje në lidhje me këtë incident.

Dumani, bashkëpunëtor i drejtësisë dhe i pandehur
Nuredin Dumani u arrestua më 29 mars 2022 dhe është një prej bashkëpunëtorëve të drejtësisë të përdorur nga SPAK në disa hetime të rëndësishme për krimin e organizuar.

Dëshmitë e tij janë përfshirë në disa procedime të SPAK, mes tyre dosja “Plumbi i artë”, si dhe hetimet që lidhen me Suel Çelën, Behar Bajrin, vëllezërit Çopja dhe persona të tjerë të dyshuar për përfshirje në krim të organizuar.

Pavarësisht statusit si bashkëpunëtor i drejtësisë, Dumani është gjithashtu i pandehur në një proces penal. SPAK e akuzon për tetë vrasje, tentativa vrasjeje, sigurim të kushteve për kryerjen e vrasjeve, grabitje me dhunë dhe armë, si dhe për pjesëmarrje në grup të strukturuar kriminal.

Incidenti në paraburgimin “313” është bërë publik në një kohë kur dosja “Plumbi i artë” ndodhet në fazën përfundimtare, ndërsa prokuroria pritet të paraqesë pretencën dhe kërkesat për dënimin e të pandehurve.