Trupi i pajetë i Miklovan Dakajt, 30 vjeç nga Shkodra, u gjet më 24 gusht pranë brigjeve të detit në Marbella të Spanjës. Që prej asaj date, autoritetet spanjolle kanë nisur hetimet për të zbuluar rrethanat e vdekjes, pasi dyshohet se i riu ishte i përfshirë në rrjete të trafikut të drogës, si në Itali, ashtu edhe në Spanjë.
ABC News meson se autoritetet shqiptare janë vënë te marten në dijeni të detajeve të reja lidhur me rastin. Në trupin e Dakajt janë gjetur dy dokumente identiteti me emra të ndryshëm, gjë që ka ngritur dyshime se ai i përdorte për t’iu shmangur autoriteteve për shkak të aktivitetit kriminal.
Për identifikimin shkencor të viktimës, policia spanjolle ka marrë mostrat e ADN-së së vëllait dhe vajzës së Dakajt. Deri më tani, familjarëve të tij në Shkodër dhe në Spanjë nuk u është konfirmuar zyrtarisht identiteti i trupit, në pritje të përputhjes së të dhënave gjenetike.
Hetimet kanë zbuluar se ndër kontaktet e fundit të Dakajt ishte edhe Juxhin Drazhi, i arrestuar më 8 gusht në Spanjë për llogari të SPAK, si pjesë e grupit të Elvis Doçit, i njohur si “Visi i Pojës”. Ky grup akuzohet se ka trafikuar tonelata kokaine nga Amerika Latine drejt Spanjës dhe vendeve të tjera të Bashkimit Europian.
Miklovan Dakaj kishte humbur kontaktet me familjen që prej majit të këtij viti. Të afërmit e tij kanë treguar se kishin marrë një mesazh anonim ku shkruhej se “të mos e kërkojnë më Miklovanin, pasi është vrarë dhe trupi është hedhur në bregun e Marbellas”.
