Dikush të zgjojë Edi Ramën… Helmimi i kursantëve në Akademinë e Sigurisë: Kush do të mbajë përgjegjësi?
Një tjetër ngjarje e rëndë ka tronditur Akademinë e Sigurisë në Sauk, ku rreth 60 kursantë kanë shfaqur simptoma të forta të helmimit ushqimor, ndërsa dyshimet e para lidhen sërish me ushqimin e furnizuar nga kompania e kateringut “SORI-AL”.
Sipas raportimeve, 31 kursantë kanë kërkuar ndihmë mjekësore gjatë natës për shkak të të vjellave, diarresë, temperaturës dhe dhimbjeve të kokës. Mëngjesin pasues, edhe 29 kursantë të tjerë janë paraqitur me simptoma të ngjashme dhe janë dërguar për trajtim mjekësor. Ndërkohë, autoritetet kanë nisur hetimet dhe janë marrë mostra ushqimore për analiza laboratorike.
Kjo është hera e dytë brenda pak muajsh që kursantët e Akademisë së Sigurisë përballen me një situatë të tillë. Në rastin e mëparshëm, 52 studentë u prekën nga helmimi ushqimor, ndërsa analizat zbuluan praninë e baktereve Escherichia coli dhe stafilokokut në ushqimin e konsumuar. Kompania u gjobit dhe aktiviteti i saj u bllokua përkohësisht, por më pas u lejua të vazhdonte punën.
Pikërisht këtu lindin pyetjet që kërkojnë përgjigje publike:
Kush do të mbajë përgjegjësi nëse provohet se kemi të bëjmë me një rast të përsëritur të neglizhencës? Kush garanton sigurinë ushqimore të të rinjve që po përgatiten të veshin uniformën e Policisë së Shtetit?
Po ashtu, publiku pret të dijë se cili ka qenë roli i institucioneve përgjegjëse pas rastit të parë. A janë zbatuar të gjitha masat e nevojshme për të parandaluar përsëritjen e një ngjarjeje të tillë? A kanë funksionuar mekanizmat e kontrollit dhe mbikëqyrjes?
Një tjetër pyetje që shtrohet është: A po e ndjek qeveria e Edi Rama këtë situatë me seriozitetin që meriton? Kur brenda një institucioni shtetëror ndodhin dy episode të ngjashme në një periudhë të shkurtër kohore, qytetarët kanë të drejtë të kërkojnë transparencë, hetim të plotë dhe përgjegjësi konkrete.
Kursantët e Akademisë së Sigurisë janë efektivët e ardhshëm që do të kujdesen për rendin dhe sigurinë publike. Për këtë arsye, çdo dyshim mbi sigurinë e tyre shëndetësore duhet të trajtohet me prioritet maksimal dhe me përgjigje të qarta nga të gjitha institucionet përgjegjëse.
