Policia ka ndaluar me iniciativë avokatin Ulian Bajrami, mbrojtësin ligjor të Maksim Suçit, alias Lika, person i arrestuar disa ditë më parë në Elbasan gjatë një operacioni ku u sekuestruan armë zjarri.
Sipas të dhënave, gjatë seancës për caktimin e masës së sigurisë, avokati Bajrami ka kaluar në kërcënime të drejtpërdrejta duke deklaruar se “do merret personalisht me prokurorin dhe me të gjithë oficerët e policisë” që po hetojnë çështjen.
Këto deklarata janë konsideruar kërcënim i hapur ndaj përfaqësuesve të akuzës dhe punonjësve të policisë, ndaj Policia e Shtetit ka ndërhyrë duke ndaluar avokatin me iniciativë.
Ndalimi i avokatit të Maks Likës është bërë për veprat penale “Kanosje për shkak të detyrës”, “Kundërshtim dhe goditje e gjyqtarit” si dhe “kanosje e gjyqtarit”!
Në Gjykatën e Elbasanit u zhvillua më 17 tetor seanca për vlerësimin e arrestit dhe caktimin e masave të sigurisë për 14 të arrestuarit gjatë kësaj jave në një lokal pranë segmentit rrugor Elbasan–Ish-Metalurgji, në fshatin Katund i Ri.
Gjykata vendosi që të lërë në qelli 6 nga të arrestuarit, ndërsa la në detyrim paraqitje 7 të tjetër, përfshirë edhe ish-deputetin Bujar Muça.
Ndërsa 17-vjeçari që ra në prangat e policisë është lënë pa masë sigurie.
Masat e vendosura nga gjykata janë:
Akil Kërtusha, 49 vjeç – arrest me burg
Ergys Tusha, 39 vjeç – arrest në shtëpi
Ervin Cani, 36 vjeç – detyrim paraqitje
Egi Caushi, 32 vjeç – arrest me burg
Maksim Suçi, 47 vjeç – arrest me burg
Ansen Mullai, 25 vjeç – arrest në shtëpi
Stefan Memelli, 46 vjeç – arrest me burg
Bujar Muça, 53 vjeç (sipërmarrës) – detyrim paraqitje
Jurges Mullai, 30 vjeç – detyrim paraqitje
Blerim Heta – detyrim paraqitje
Taulant Zykollari, 52 vjeç – detyrim paraqitje
Arjan Dada, 49 vjeç – detyrim paraqitje
Endri Dada, 29 vjeç – detyrim paraqitje
Arrestimet u realizuan si rezultat i një operacioni policor të koduar “Fast”, i cili u zhvillua nën drejtimin e Prokurorisë së Rrethit Gjyqësor Elbasan.
