Dy mjekët e pezulluar në Itali për vdekje të pacientëve operojnë te Trita Hospital
Ministria e Shëndetësisë nis inspektimet në spitalin privat ‘Trita Hospital’ , për dy mjekët italianë Andrea Formiga dhe Marco Procopio, të cilët ndonëse rezultojnë të pezulluar në Itali për vdekje të pacientëve, operojnë në Tiranë te Trita Hospital. Pas denoncimit, Ministria e Shëndetësisë thotë se strukturat respektive të inspektimit kanë shkuar në spitalin në fjalë për të nisur verifikimi përkatës. Paralelshit, Shëndetësia thotë se po kryhet hetim edhe nga Prokuroria e Tiranës për vdekjen e biznesmenit italian Massimo Ferro në QSUT, pas ndërhyrjes për ngushtimin e stomakut te Trita Hospital me kirurgun Andrea Formiga.
Ministria e Shëndetësisë thotë se e ka detyrim ligjor që njëherë në vit të bëj inspektime në strukturat spitalore private. “Rasti konkret, mund të ketë ndodhur që të jetë punësuar pas verifikimeve tona, pra gjatë muajve që ne e kemi pas bërë inspektimin”, theksohet në reagim.
Reagimi i plotë
“Struktura respektive pas denoncimit tuaj dhe njohjes me rastin konkret, strukturat respektive të inspektimit kanë shkuar në spitalin në fjalë për të nisur verifikimi përkatës. Ndërkohë, edhe Prokuroria e kishte nis hetimin për rastin konkret pas denoncimit në media.
Ministria e Shëndetësisë e ka detyrim ligjor që njëherë në vit të bëj inspektime në strukturat spitalore private. Rasti konkret, mund të ketë ndodhur që të jetë punësuar pas verifikimeve tona, pra gjatë muajve që ne e kemi pas bërë inspektimin.
Në bazë të ligjit ne si institucion vihemi në ndjekje të rasteve në momentin kur kemi denoncim.
Deri tani për rastin që ju flisni në ministri nuk ka ardhur asnjë denoncim me shkresë zyrtare, ne u njohëm përmes jush me këtë rast.
Spitali privat ndiqet normalisht në momentë që gjejn shkelje të veprave penale. Është urdhri i mjekëve që lëshon licencat. Ne nuk kemi kapacitete që ministria të ketë çdo inspektor për çdo strukturë spitalore private”.
