ECFA ( Kredo ) fitoi 6.3 milionë euro nga interesat e larta ndaj qytetarëve

ECFA, e njohur për publikun e gjerë si Kredo, regjistroi vitin e kaluar një fitim neto pas taksave prej 593.2 milionë lekësh ose 6.3 milionë euro, duke qenë një nga dy kompanitë e mikrokredive që aplikojnë interesat më të larta në treg.

Modeli i biznesit të kredive me interesa të shtrenjtë vazhdon normalisht pavarësisht skandaleve të shumta që kanë shoqëruar këtë treg, të cilat kulmuan dy vite më parë me shpërthimin e skemës MCA. Pas skandalit, Banka e Shqipërisë ka ndërhyrë disa herë për të ulur interesat maksimale që këto kompani ngarkojnë mbi huamarrësit.

Në vendimin më të fundit, interesi maksimal mbi kredinë konsumatore u kufizua në 51.3 për qind, çka mbetet sërish shumë i lartë. Megjithatë, modeli i mikrokredive komerciale vijon të mbështetet tek interesat e larta.

Vetë ECFA e financon aktivitetin e saj me hua me interes rreth 13.5 për qind në vit. Këto fonde, të siguruara nga bankat, aksionerët ose përmes emetimit të obligacioneve, më pas jepen si kredi për qytetarët me interesa edhe më të larta.

Berisha: IUTE Credit dhe Kredo po çojnë qytetarët drejt vetëvrasjes

ECFA kishte në fund të vitit të kaluar një portofol kredish prej rreth 3.9 miliardë lekësh ose 41 milionë euro, nga i cili gjeneroi 32 milionë euro të ardhura nga interesi në vit.

Kjo do të thotë se për çdo 100 lekë kredi të dhëna, kompania gjeneron rreth 78 lekë të ardhura nga interesat në vit.