Gjykata lë në burg Granit Pepnikën dhe Redion Rexhmati
Gjykata e Vlorës ka caktuar masën e sigurisë “Arrest në burg” për Granit Pepnikën, i arrestuar pak ditë më parë në Dhërmi, në kuadër të hetimeve për një skemë të dyshuar mashtrimi kompjuterik që, sipas dosjes hetimore, dyshohet se u ka shkaktuar qytetarëve europianë një dëm financiar që llogaritet në mbi 50 milionë euro.
E njëjta masë sigurie është vendosur edhe për Xhoni Hitajn, i akuzuar për veprën penale “Mashtrim kompjuterik”, si dhe për Redion Rexhmatin, i cili akuzohet për “Përkrahja e autorit të krimit”.
Siç është raportuar më herët, Granit Pepnika konsiderohet një nga personat kyç në dosjen e bujshme të call center-ave, ndërsa ai dhe Xhoni Hitaj ishin shpallur në kërkim që prej muajit prill, pasi Gjykata e Tiranës kishte caktuar ndaj tyre masën e sigurisë “Arrest në burg”.
Tre të dyshuarit u arrestuan të premten në zonën e Drimadhës, gjatë operacionit policor të koduar “Rrjetet”, të zhvilluar nga strukturat e Policisë së Shtetit. Operacioni kishte si objektiv goditjen e personave të dyshuar për përfshirje në mashtrime kompjuterike dhe identifikimin e bashkëpunëtorëve të tyre.
Hetimet vijojnë për dokumentimin e plotë të aktivitetit të dyshuar kriminal, si edhe për identifikimin e personave të tjerë që mund të jenë përfshirë në këtë skemë, e cila dyshohet se ka mashtruar qindra shtetas europianë përmes rrjeteve të call center-ave.
