Një ngjarje e rëndë është regjistruar në fshatin Panaja të Vlorës, ku një 36-vjeçar Egli Aliraj, në gjendje të dehur, i ka vënë flakën një mjeti të tonazhit të rëndë që përdorej për punimet e shtrimit të rrugës.
Sipas informacioneve paraprake, pas djegies së mjetit, 36-vjeçari ka qëlluar edhe me armë gjahu në ajër, duke shkaktuar panik te banorët dhe punëtorët që ndodheshin në zonë.
Menjëherë pas njoftimit, në vendngjarje kanë mbërritur forcat e Policisë, të cilat kanë ndërhyrë për neutralizimin e situatës dhe kanë shoqëruar autorin e dyshuar. Nga të shtënat nuk raportohet për persona të lënduar, ndërsa mjeti ka pësuar dëme të konsiderueshme nga zjarri.
Grupi hetimor po punon për zbardhjen e plotë të rrethanave të ngjarjes dhe për përcaktimin e motiveve që çuan 36-vjeçarin në këtë akt. Ndaj tij pritet të ngrihen disa akuza, përfshirë shkatërrimin e pronës me zjarrvënie dhe armëmbajtjen apo përdorimin e armës në kundërshtim me ligjin.
Policia vijon hetimet për dokumentimin e plotë të ngjarjes.
