Zbardhet në kohë rekord ngjarja e rëndë e ndodhur në Peshkopi, ku biznesmeni Zija Shulku u kërcënua me gjobë prej 50 milionë lekësh, me paralajmërimin se nëse shuma nuk do të paguhej, biznesi i tij, një karburant, do të hidhej në erë.
Policia e Dibrës ka mundur të identifikojë dhe ndalojë autorin e dyshuar të kërcënimit. Bëhet fjalë për një 21-vjeçar, i cili, sipas të dhënave paraprake, e njihte biznesmenin dhe kishte njohje edhe djalin e tij.
Kërcënimi ishte dërguar përmes një kutie, ndërsa pranë lokalit ishte lënë edhe një pako e dyshimtë, e cila në pamje të parë ngjante me një pajisje artizanale shpërthyese me telekomandë. Pas kontrollit, rezultoi se pakoja ishte bosh dhe nuk përmbante lëndë shpërthyese.
Zbardhet në kohë rekord gjobvënia në Dibër
Hetimet e zhvilluara nga Komisariati i Dibrës çuan në identifikimin e 21-vjeçarit. Sipas të dhënave të siguruara paraprakisht, autori i dyshuar e kishte vendosur pakon pranë biznesit dhe më pas ishte larguar nga zona.
Në përpjekje për të shmangur identifikimin, 21-vjeçari dyshohet se ka ndërruar rrobat dhe është rikthyer sërish pranë vendngjarjes. Pikërisht lëvizjet e tij kanë rënë në vëmendjen e Policisë, e cila ka ndërhyrë duke e ndaluar.
Gjatë veprimeve hetimore, i riu dyshohet se ka treguar edhe rrobat që kishte veshur në momentin kur kishte vendosur pakon e dyshimtë.
Një tjetër detaj i hetimit lidhet me mënyrën e kërkimit të shumës së parave. Sipas informacioneve paraprake, 50 milionë lekët nuk janë kërkuar në para fizike, por përmes kriptomonedhës Bitcoin.
Policia vijon veprimet hetimore për dokumentimin e plotë të ngjarjes, ndërsa materialet procedurale pritet t’i referohen Prokurorisë për veprime të mëtejshme.
