Dionis Teqja i MegaTek fërkon duart për lekë, AGSH: Abuzive dhe formë presioni
Asociacioni i Gazetarëve të Shqipërisë reagoi lidhur me rastin e padisë së ngritur nga biznesmeni Dionis Teqja ndaj 10 mediave online, i cili kërkon fshirjen e lajmeve dhe një dëmshpërblim prej 680 mijë eurosh në total.
Konkretisht, gjyqtari Flamur Kapllani, përmes një mase “sigurim padie” të marrë nga Gjykata e Shkallës së Parë të Juridiksionit të Përgjithshëm Tiranë, urdhëroi heqjen e një lajmi që lidhet me biznesmenin Dionis Teqja.
Lidhur me këtë zhvillim, Asociacioni i Gazetarëve të Shqipërisë bëri të ditur se po e ndjek me vëmendje çështjen, ndërsa shprehu shqetësimin se masat që lidhen me heqjen ose bllokimin e publikimeve mediatike duhet të trajtohen me kujdes të veçantë, duke pasur parasysh ndikimin që ato mund të kenë mbi ushtrimin e profesionit të gazetarit dhe të drejtën e publikut për t’u informuar.
“Asociacioni i Gazetarëve të Shqipërisë kërkon nga organet gjyqësore të vijojnë të garantojnë një proces të drejtë dhe në përputhje me standardet demokratike dhe jurisprudencën europiane mbi lirinë e medias”, thuhet në reagim.
Në deklaratë u ndal edhe tek vlerat e kërkuara si dëmshpërblim ndaj mediave dhe gazetarëve, ku sipas Asociacionit bëhet fjalë për shifra të pajustifikuara dhe presion ndaj medias.
“Në çdo rast, shifrat marramendëse që kërkohen si dëmshpërblim ndaj gazetarëve dhe mediave, që arrijnë deri në 500 mijë euro, janë tërësisht abuzive dhe formë presioni”, theksoi Asociacioni i Gazetarëve të Shqipërisë.
