KLSH jep Alarmin! Si u zhdukën 2.5 ton produkte Wudy dhe roli i Spar Albania
Auditimi i KLSH zbulon mungesën e mbi 2.5 ton ushqimesh të skaduara që duhej të asgjësoheshin. Dyshimet bien mbi SPAR Albania, ndërsa kompania nuk jep shpjegime.
Një raport përfundimtar auditimi nga Kontrolli i Lartë i Shtetit ka nxjerrë në pah një situatë alarmante në zinxhirin e sigurisë ushqimore në vend, duke ngritur pikëpyetje serioze mbi mënyrën e menaxhimit të produkteve të skaduara.
Sipas gjetjeve, rreth 2.5 ton ushqime të skaduara, përfshirë salçiçe të kontaminuara, nuk kanë asnjë gjurmë të dokumentuar që të tregojë se ku kanë përfunduar. Në raport përmendet se këto produkte duhej të asgjësoheshin sipas procedurave përkatëse.
Burime mediatike bëjnë me dije se subjekti i përfshirë është SPAR Albania, një nga rrjetet më të mëdha të supermarketeve në vend.
Sipas auditimit, në total duhej të asgjësoheshin 8,852 kg produkte mishi të kontaminuar dhe ushqime të tjera të skaduara. Megjithatë, në landfill rezulton të jenë depozituar vetëm 6,280 kg, ndërsa pjesa tjetër – mbi 2.5 ton – nuk figuron në asnjë dokument zyrtar.
Kjo mospërputhje nuk konsiderohet thjesht një gabim administrativ, por një problem serioz që ngre dyshime për shkelje të mundshme në procesin e asgjësimit të produkteve potencialisht të rrezikshme për shëndetin publik.
Raporti thekson gjithashtu mungesën e dokumentacionit që provon dezinfektimin e ambienteve ku janë ruajtur këto produkte, çka rrit rrezikun për kontaminim të produkteve të tjera ushqimore.
Për shkak të interesit të lartë publik, media i është drejtuar për informacion SPAR Albania, por deri tani nuk ka pasur një reagim zyrtar nga kompania.
Ndërkohë, mungesa e transparencës në një çështje që lidhet drejtpërdrejt me sigurinë ushqimore po rrit shqetësimin tek konsumatorët dhe kërkesat për hetim të plotë nga autoritetet përkatëse.
