Kompania reagon pas protestës në Zvërnec: Investim mbi 4 mld euro, do të krijojë mbi 10 mijë vende pune
Kompania “Zvërnec South Adriatic Development” ka reaguar pas tensioneve të regjistruara gjatë ditës së sotme në Zvërnec mes protestuesve dhe përfaqësuesve të projektit.
Përmes një deklarate për mediat, kompania shprehu keqardhje për atë që e cilësoi si abuzim me ndjenjat e publikut në rrjetet sociale dhe përpjekje për të përbaltur një investim që, sipas saj, pritet të kalojë vlerën e 4 miliardë eurove.
Sipas kompanisë, rrethimi i vendosur në zonë është bërë në zbatim strikt të legjislacionit shqiptar dhe mbi një pronë private që ajo disponon. Në deklaratë thuhet se projekti ndodhet ende në fazën fillestare dhe se po zhvillohet në dialog të vazhdueshëm me institucionet përgjegjëse.
Kompania bën të ditur se investimi synon të arrijë standardet më të larta arkitekturore dhe mjedisore, ndërsa projekti final i ndërtimit dhe ai mjedisor po finalizohen nga studio që ajo i cilëson ndër më të mirat në botë. Sipas deklaratës, këto dokumente do të bëhen publike sapo të përfundojnë.
“Zvërnec South Adriatic Development” pretendon se investimi do të kontribuojë me një rritje nga 3 deri në 4 për qind në Prodhimin e Brendshëm Bruto të Shqipërisë gjatë pesë viteve të ardhshme. Po ashtu, kompania deklaron se projekti do të krijojë direkt dhe indirekt mbi 10 mijë vende të reja pune, duke e cilësuar atë si një motor të rëndësishëm ekonomik për qarkun e Vlorës dhe për vendin.
Në reagim thuhet gjithashtu se investimi do të kujdeset tërësisht për ruajtjen e mjedisit dhe biodiversitetit të zonës. Sipas kompanisë, prej dy vitesh janë angazhuar ekspertë të nivelit global për studimet mjedisore përkatëse, të cilat do të ndahen si me institucionet, ashtu edhe me publikun.
Kompania thekson se trualli ku do të zhvillohet projekti është pronësi private “metër për metër” dhe se është blerë nga pronarët e ligjshëm, me certifikata pronësie të noterizuara. Sipas deklaratës, të gjitha transfertat e blerjeve janë kryer përmes sistemit bankar dhe janë të verifikueshme.
Po ashtu, “Zvërnec South Adriatic Development” shprehet se të gjithë punonjësit e punësuar apo që do të punësohen më tej në projekt janë dhe do të jenë subjekt i kontratave sipas legjislacionit shqiptar.
Në deklaratë thuhet se kompania ka lidhur marrëveshje edhe me disa prej brandeve më të njohur ndërkombëtarë në fushën e hotelerisë dhe të shërbimeve, duke përfshirë restorante, bare, aktivitete sportive dhe edukative.
Kompania mbron gjithashtu profilin e investitorëve, duke deklaruar se ata kanë një karrierë të pakontestueshme ndërkombëtarisht, zotërojnë kompani të kuotuara në bursat ndërkombëtare dhe kapitale të pakontestueshme.
Duke iu referuar situatës së sotme në terren, kompania dënon çdo akt dhune ndaj pronës private dhe hedh poshtë, sipas saj, përpjekjet për disinformimin e publikut. Në fund të deklaratës, “Zvërnec South Adriatic Development” kërkon mirëkuptimin dhe durimin e publikut, ndërsa paralajmëron se ndaj kujtdo që do të përpiqet ta pengojë ose shantazhojë, do të përballet ligjërisht.
