Dy shqiptarë janë plagosur me armë zjarri në një atentat të ndodhur mëngjesin e së hënës në Athinë. Si pasojë e të shtënave me armë, plumbat kanë kapur 39-vjeçarin Negri Sinovarfaj dhe babanë e tij 70-vjeçar. Sipas policisë greke, të dy të plagosurit ndodhen jashtë rrezikut për jetën.
Dyshimet e policisë greke janë se atentati ka ndodhur për shkak të përplasjeve mes bandave kriminale greko-shqiptare. Pavarësisht se 39-vjeçari Negri Sinovarfaj nuk rezulton i përfshirë në ngjarje kriminale, ai kishte në pronësi lokalin ku ndodhi atentati. Ky lokal, sipas hetuesve grekë, kishte si pronar të vërtetë një tjetër shqiptar, 34-vjeçarin nga Vlora, Andon Salati, i cili rezulton të jetë një nga drejtuesit e një bande kriminale që vepron në Athinë.
Lokali ku ndodhi ngjarja është përmendur në dosjen dhe në përgjimet në Sky ECC në Greqi, ku u godit një bandë shqiptare në dhjetor 2024. Në atë kohë, bashkë me Andon Salatin u arrestuan 14 shqiptarë të tjerë dhe disa shtetas grekë. Ata ishin të përfshirë në trafikimin e kokainës, hashashit dhe heroinës nga Shqipëria, Spanja dhe Amerika Latine drejt Greqisë.
Andon Salati, sipas dosjes së operacionit në dhjetor 2024, konsiderohet një nga krerët e një grupi kriminal në bashkëpunim me Denis Grabockën. Salati, i cili njihet me pseudonimet “Sal”, “Salah” dhe “Toni”, rezulton përdorues i platformave të kriptuara “Sky ECC” dhe “EncroChat”.
Pjesë e grupit të Andon Salatit ishte edhe Aleksandër Sadikaj nga Memaliaj, i ekzekutuar në Tiranë në vitin 2022 pas shpërthimit të një eksplozivi në makinë. Kjo ngjarje u pasua me disa episode të rënda kriminale në Shqipëri. Në dhjetor të vitit 2022 dyshohet se, në shenjë hakmarrjeje, në Shqipëri u vra Edmond Papa, gjithashtu i përfshirë në një tjetër bandë kriminale në Greqi. Për vrasjen e Papës u dyshua se u organizua nga daja i Sadikajt, Andrea Kalemi, dhe miqtë e tij. Andrea Kalemi, i njohur si “Tik Kalemi”, përmendet si drejtues i një bande kriminale që merret me trafikun e drogës në Athinë.
Ndërkohë, Andon Salati dhe Denis Grabocka rezultojnë pronarë të fshehtë të një kompanie që jep makina me qira në Athinë, si dhe të disa bizneseve të tjera që i kanë vendosur në emër të personave të tretë.
Salati, në shkurt të vitit 2016, rezulton të jetë ndaluar nga policia shqiptare në pikën kufitare të Kakavijës me 148 mijë euro cash, të cilat po tentonte t’i fuste në Shqipëri, por për këtë rast është ndjekur në gjendje të lirë. Nga viti 2018 deri në vitin 2020, ai ka qenë i burgosur në Korydallos si kreu i një grupi kriminal që shiste lëndë narkotike në Athinë dhe Mykonos. Pavarësisht kësaj, ai vazhdonte kontrollin e trafikut dhe shpërndarjes së drogës nga burgu, përmes platformave të kriptuara.
