Ku shkuan paratë? Ja çfarë tha 3 orë në SPAK Rrok Gjoka…Ndërtoi tunelin e Llogarasë dhe të Murrizit
Biznesmeni Rrok Gjoka është marrë në pyetje këtë të mërkurë në ambientet e Prokurorisë së Posaçme (SPAK), ku ka qëndruar për rreth tre orë.
Burime nga SPAK bëjnë me dije se Gjoka është pyetur lidhur me fondet publike të përfituara në kuadër të tenderimeve, mënyrën se si janë marrë dhe ku kanë përfunduar paratë, si edhe për fatura të dyshuara si të fryra dhe punime që dyshohet se nuk janë kryer sipas standardeve të kërkuara. Sipas të njëjtave burime, hetuesit kanë kërkuar shpjegime edhe mbi destinacionin e fondeve publike, mënyrën e zhvillimit të tenderit dhe dokumentacionin që lidhet me procedurat e prokurimit.
Pas daljes nga godina e SPAK, Gjoka nuk dha asnjë deklaratë për mediat, ndërsa Prokuroria e Posaçme nuk ka bërë ende një reagim zyrtar mbi arsyen e thirrjes së tij.
Emri i Rrok Gjokës lidhet me një nga procedurat më të debatuara të prokurimit publik në Shqipëri, atë të ndërtimit të tunelit të Llogarasë, dosje për të cilën është marrë e pandehur edhe ish-zv.kryeministrja Belinda Balluku.
Kompania “Gjoka shpk” u shpall fillimisht fituese e tenderit për ndërtimin e tunelit, por procedura u anulua. Në bisedat e administruara nga hetimi mes Belinda Ballukut dhe ish-kreut të Autoritetit Rrugor Shqiptar (ARRSH), Ervis Berberi, Balluku shprehte rezerva për këtë procedurë, duke i thënë Berberit se kishte një ndjesi jo të mirë për tenderin.
Më pas, kontrata iu dha një konsorciumi turk me një ofertë rreth 50 milionë euro më të lartë se ajo e paraqitur nga kompania shqiptare. Megjithatë, pavarësisht se nuk fitoi kontratën, një pjesë e konsiderueshme e punimeve në terren u realizua nga kompania e Gjokës në cilësinë e nënkontraktorit.
Tenderi i tunelit të Llogarasë është nën hetim nga SPAK, ndërsa në dosjen e prokurorisë ngrihen dyshime se procedura e prokurimit është manipuluar për t’i krijuar avantazh konsorciumit fitues. Deri tani nuk është konfirmuar zyrtarisht nëse marrja në pyetje e Rrok Gjokës lidhet drejtpërdrejt me këtë çështje apo me një hetim tjetër.
