Kush e ka fajin? Vrasja e Enea Mekollit, prokuroria zgjeron hetimet
Prokuroria, në bashkëpunim me Agjencinë e Mbikëqyrjes Policore, është duke hetuar zinxhirin drejtues të Policisë së Korçës, pas vrasjes së efektivit të forcave Shqiponja, Enea Mekolli, dhe plagosjes së kolegut të tij, Edison Adri, gjatë aksionit për arrestimin e të shumëkërkuarit Violand Bracellari. Sipas Prokurorisë, po hetohet nëse ka pasur një plan operacional për kapjen e të shumëkërkuarit dhe nëse janë analizuar me kujdes të gjithë elementët e sigurisë përpara se efektivët të dërgoheshin në aksion.
Në këtë kuadër, janë duke u kryer një sërë akt-ekspertimesh, që nga armët me të cilat ishin pajisur policët në aksion, antiplumbët që mbanin, si dhe është duke u analizuar me kujdes mënyra e ndërhyrjes.
Policia ka deklaruar zyrtarisht se në aksion morën pjesë 10 policë dhe se kishte plan operacional për ndërhyrjen.
Enea Mekolli u qëllua për vdekje nga Violand Bracellari, teksa forcat u afruan në stanin e tij, në Malin e Bodesë, në Maliq, për t’i vënë prangat.
I plagosur mbeti edhe Edison Adri. Bracellari ishte i dënuar me 10 vite burgim për trafik narkotikësh dhe ishte në kërkim. Ai paraqiste rrezikshmëri të lartë shoqërore dhe jetonte në arrati në zonën e thellë malore, ku kishte ngritur edhe stallë me fondet e AZHBR-së, që po ashtu po hetohet nga Prokuroria.
Ka dyshime se ai kishte lidhje me segmente të Policisë, që e ndihmonin të jetonte në arrati, por deri më tani hetimet në këtë drejtim nuk kanë dhënë rezultat.
Si u realizua vrasja e efektivit Enea Mekolli në Maliq? Një çoban u vesh si polici!
I iku 4 herë RENEA-s, a u nënvlerësua ish-komando? Vrau një polic dhe plagosi një tjetër
