Hetimet e Prokurorisë së Posaçme kanë zbuluar një nga aferat më të turpshme në Shqipërinë post komuniste, ku zyrtarë të lartë të shtetit, ata që xhirojnë qindra miliona euro, në bashkëpunim me biznesmenë të fuqishëm, me lidhje të forta me politikën dhe krimin, sillen si një bandë e mirëfilltë kriminale. Ngjarje që të kujtojnë Italinë e viteve ’80-’90, apo aktualisht grupet apo politikën e vendeve të Amerikës Latinë apo të disa vendeve në Amerikën Veriore.
Dosja mund të konsiderohet një nga më të arrirat e vetë SPAK-ut, pasi veprimet e anëtarëve të saj janë thjesht të turpshme, ku tashmë detyra e BKH-së apo edhe vetë Prokurorisë, duhet të jetë gjetja e parave dhe vendeve se ku janë strehuar kapot e këtij grupi, të fshehur në parajsa natyrore apo në parajsa fiskale, atje ku kanë çuar paratë e vjedhura të shqiptarëve të varfër.
Në skenë kanë dalë politikanë të rëndësishëm, biznesmenë të fuqishëm, me në krye Ergys Agasin apo Ermal Beqirin, por edhe drejtoreshën e AKSHI-t, Mirlinda Karçanaj, të cilët ishin “shkrirë” në një grup të vetëm, duke dyfishuar vlerat e tenderit, apo duke marrë peng biznesmenë të tjerë që të mos futeshin në tendera apo të tërhiqeshin nga ankimi.
Një nga rastet më flagrante ka qenë padyshim marrja peng e Gerond Meçes, një kundërshtar i Ermal Beqirit, ku organizator, sipas dosjes së SPAK-ut, janë disa persona, si Agasi, Beqiri, vetë Karçanaj, apo edhe anëtarët e Komisionit të Prokurimit Publik. Koordinimi i tyre ka qenë mbreslënës, ku nga zyra e famshme Gysit është organizuar pengmarrja.
Megjithatë, krahas këtyre emrave, në dosjen e SPAK-ut, një kopje të së cilës e disponon edhe VoxNews, faktohen veprimet e një tjetër anëtari të grupit kriminal, i cili është as më shumë e as më pak por një tjetër biznesmen i fuqishëm, Laert Kasaj, i cili nëpërmjet firmës së tij ka vepruar me Ergysin apo me Ermalin për të marrë peng Gerond Meçen.
Në dosje shkruhet mjaft qartë se, gjatë kohës që Gerond Meçe është marrë peng, pengmarrësit kanë kontaktuar me administratorin e shoqërisë së tij, duke e “urdhëruar” që të tërhiqet nga ankimi në KPP në disa procedura. Në datën 18 gusht 2025, është bërë një urdhër për heqjen nga pezullimi i procedurës së prokurimit, ku Komisioni më pas ka shpallur fitues operatorin ekonomik “Ratech” shpk. Pikërisht, pronari i kësaj firme është Laert Kasaj, i cili tashmë ia ka kaluar fiktivisht aksionet një të afërmi, me të njëjtin mbiemër.
Këto veprime të pengmarrësve e kanë ndihmuar së tepërmi “Ratech” të fitojë tenderin e majmë, ku të gjithë anëtarët e grupit kanë vepruar me shpejtësi, në disa raste të fitonte Ermal Beqiri dhe në këtë rast të fitonte para Laert Kasaj.
Prokuroria e Posaçme ka zbuluar se, kompania “Ratech” me ndihmën e pengmarrësve të Gerond Meçes, i kanë dhënë në “tavolinë” biznesmenit Laert Kasaj plot 71.996.600 lekë. Mësohet se oferta e tyre ka qenë afërsisht 12.000.000 lekë më shumë sesa oferta e operatorit Advance Business Solutions, ABS.
Një skemë e qartë kriminale, ku të gjithë aktorët janë munduar që të eliminojnë Meçen me qëllim që t’i fitojnë tenderët më lehtë. Normalisht dosja është nën hetim e sipër, ku tashmë priten edhe masa të tjera shtrënguese.
